20th February 2018, Tuesday

E-budhabar

एकता विरोधीका रूपमा किन मुछिए यी नेता ?



काठमाडौं । नेकपा (एमाले) ले पार्टी कार्यालय धुम्बाराहीमा सरकारका गलत निर्णय र कदमबारे पार्टीको धारणा सार्वजनिक गर्न माघ १० गते आयोजना गरेको पत्रकार सम्मेलनमा पत्रकारहरूले अध्यक्ष केपी ओलीसँगै बसेका महासचिव ईश्वर पोखरेलको नामै लिएर अध्यक्ष ओलीसामु प्रश्न तेस्र्याए । विभिन्न सञ्चार माध्यममार्फत लाइभ प्रसारणसमेत भएको सो कार्यक्रममा पत्रकारको प्रश्न थियो, ‘तपाईंकै पार्टीका महासचिवको नामसमेत माओवादी र तपाईंहरूको पार्टीबीच हुने भनिएको पार्टी एकताको विरोधीका रूपमा आइरहेको छ नि ?’ हरेक प्रश्नको चोटिलो जवाफ फर्काउने अध्यक्ष ओलीले यो प्रश्नको भने गोलमटोल जवाफ दिए । पार्टीका नेताका पनि विभिन्न अभिव्यक्ति आएको सुनिएको छ भन्दै अध्यक्षले गोलमटोल जवाफ दिएपछि पत्रकारहरूले अरू खोतलखातल गर्न चाहेनन् ।
पार्टी एकताका लागि एमाले र माओवादी केन्द्रबीच घनीभूत रूपमा छलफल चलिरहेकै बेला एमाले महासचिव पोखरेलले एक दैनिक पत्रिकामा एकतापछि पनि प्रधानमन्त्री, अध्यक्ष र दलको नेता एउटै व्यक्ति हुनुपर्ने र त्यो मान्यता आफ्नो पार्टीमा स्थापित नै भएको अभिव्यक्ति दिएपछि त्यसले राजनीतिमा ठूलो तरंग उत्पन्न गरेको थियो । त्यसपछि माओवादी वृत्तमा महासचिव पोखरेलको छवि एकताविरोधी नेताका रूपमा बन्योे । जबकि, एमालेबाटै माधवकुमार नेपाल प्रधानमन्त्री हुँदा न त उनी अध्यक्ष, संसदीय दलको नेता थिए, न त झलनाथ खनाल अध्यक्ष हुँदा उनलाई दलको नेता हुन नै दिइएको थियो । अध्यक्ष र दलको नेता एउटै हुनुहुँदैन भनेरै ०७० को संविधानसभा निर्वाचनपछि तत्कालीन अध्यक्ष खनालविरुद्ध ओलीले संसदीय दलको नेतामा उम्मेदवारी दिए र जिते पनि ।
माओवादीभित्र पनि नेताद्वय कृष्णबहादुर महरा र वर्षमान पुनको नाम त्यसरी नै एकता विरोधीका रूपमा मुछिएको छ । प्रतिनिधिसभा निर्वाचनका लागि टिकटको बाँडफाँटमा छलफल चलिरहेका बेला महराले दाङ क्षेत्र नम्बर २ बाट आफूले टिकट नपाए चुनावै नलड्ने घरमै बसिरहने अभिव्यक्ति नै दिए । उनको त्यो अभिव्यक्ति वाम तालमेल र एकतामा भाँजो हाल्ने आशयसाथ प्रकट भएको बुझाइ माओवादी वृत्तमै छ । पछिल्लो समय पनि महराले माओवादी पार्टीभित्र कुनै कमिटी पद्धति नै नरहेको भन्दै अध्यक्ष दाहालविरुद्ध सार्वजानिक अभिव्यक्ति नै दिएका छन् । त्यो पनि एकतालाई असर पुग्ने गरिआएको बुझाइ कार्यकर्ता तहमा छ । नेता पुनले त आफूनिकट सञ्चारमाध्यममा एकता प्रक्रियामा आँच आउने समाचार आफंैले छपाउने र त्यस्ता समाचार आफंैले सेयर गर्नेसमेत गर्ने गरेको बताइन्छ । केही समयअघि उनले एउटा अनलाइनमा छापिएको ‘एमालेलाई राष्ट्रपति, अध्यक्ष र प्रधानमन्त्री नदिए एकता सम्भव छैन,’ समाचार सेयर गरेका थिए । त्यो समाचार उनी निकट अनलाइनमै प्रकाशित हुनु र उनैले सेयर गर्नुले पनि उनी एकताविरोधी रहेको प्रस्ट पार्ने माओवादीकै नेता–कार्यकर्ताको बुझाइ छ । एकताप्रति इमानदार नभएको सुइँको पाएरै अध्यक्ष दाहालले पनि एकतासँग सम्बन्धित कुनै पनि वार्तामा यी दुई नेतालाई निषेध गरेको चर्चा पेरिसडाँडातिर खुबै चल्ने गरेको छ ।

Leave a Reply

... र यो पनि ...

चक्रपथ

चन्द्रागिरिको ढुंगामा क–कसले गर्दै छन् गोलमाल ?

काठमाडौं । थानकोट–चन्द्रागिरि–चित्लाङ सडक आयोजना निर्माणका क्रममा ठेकेदारले उत्खननपछि आएको ढुंगा बेच्न पाउनुपर्ने लबिइङमा स्थानीय जनप्रतिनिधिहरू नै लागेका छन् । नीतिगत- ...
पूरा पढ्नुहोस्

स्रष्टा र सिर्जना

पुरस्कार र मेला–केन्द्रित प्रकाशन व्यवसाय

यस वर्षको हिउँदमा नेपाली प्रकाशनगृहहरू फेरि सुस्ताउन पुगे । हरेक वर्षको हिउँदमा निजी प्रकाशन गृहहरूले पुस्तक प्रकाशनमा तदारुकता देखाउन चाहँदैनन् । यो एउटा नियमित प्रक्रियाजस्तै- ...
पूरा पढ्नुहोस्

नयाँ पुस्तक

व्यक्तिवृत्त उघिन्ने कार्य

कुन मानिसमा कति प्रतिभा रहेको छ, कस्तो आनिबानी छ र के–कस्ता विषयहरूमा रुचि छन् ? यी सबै कुरा थाहा पाउन त्यस्ता मानिससँग गहिरो मित्रता र संगतको आवश्यकता पर्दछ । बाह्य रूपमा नियालेर- ...
पूरा पढ्नुहोस्

छोटकरीमा