22nd July 2018, Sunday

E-budhabar

यसरी बन्दै छ पार्टी एकताको खाका



यसरी बन्दै छ पार्टी एकताको खाका

काठमाडौं । पार्टी एकीकरणपछि बन्ने ‘नेपाल कम्युनिस्ट पार्टी’को सांगठनिक ढाँचा संघीय संरचनाअनुसार बनाउने गरी एमाले र माओवादी केन्द्रको एकतासम्बन्धी संयुक्त कार्यदलले प्रारम्भिक खाका तयार पारेको छ ।
गत १० फागुनमा गठित अन्तरिम राजनीतिक प्रतिवेदन लेखन कार्यदल र अन्तरिम विधान तथा संगठनसम्बन्धी कार्यदलले तीनपटक बैठक बसेर एकतासम्बन्धी प्रारम्भिक खाका तयार पारेको हो । संगठनसम्बन्धी कार्यदलले दुवै पार्टीका अध्यक्ष एकीकृत पार्टीको प्रमुख रहने गरी सहअध्यक्षको मोडालिटीमा केन्द्रीय पदाधिकारीहरू नरहने प्रारम्भिक खाका तयार पारेको छ । कार्यदलको मंगलबारको बैठकमा संगठनसम्बन्धी खाका र अन्तरिम विधानको मस्यौदामा छलफल भए पनि पूर्णता दिन अझै केही समय लाग्ने एक नेताले बताए ।
एकीकृत पार्टीको केन्द्रीय कमिटीको आकार १ सय ५० सदस्यीयसम्म चुस्त र छरितो बनाउने कि एमालेको अहिलेको २ सय ६ सदस्यीय केन्द्रीय कमिटीमा माओवादीबाट ४० प्रतिशत संख्या थपेर बढीमा ३ सय ५० सदस्यीय पु¥याउने विषयमा केन्द्रित रहेर अनौपचारिक तहमा छलफल चलिरहेको छ । माओवादीलाई केन्द्रीय कमिटीमा ४० प्रतिशत हिस्सेदारी दिने हो भने एमालेको २ सय ६ जनाको केन्द्रीय कमिटीमा १ सय ३७ थपिएर ३ सय ४३ सदस्यीय केन्द्रीय कमिटी बन्नेछ । तर, यसको टुंगो लाग्न अझै केही समय लाग्ने बताइएको छ । अन्तिममा यही मोडालिटीमा एकीकृत पार्टीको केन्द्रीय कमिटीको स्वरूप र संंरचना बन्ने सम्भावना बढेको बताइएको छ ।
कार्यदलका सदस्य गोकर्ण विष्टले सांगठनिक संंरचना, अन्तरिम विधान र राजनीतिक प्रतिवेदनका सम्बन्धमा छलफल जारी रहेको बताए । प्रधानमन्त्री केपी ओली र माओवादी केन्द्रका अध्यक्ष पुष्पकमल दाहाल ‘प्रचण्ड’ले नेतृत्वमा दुवैले आलोपालो गरेर बैठकको अध्यक्षता गर्ने, बैठकका आधारमा मर्यादाक्रम पनि निर्धारण हुने सहमति गरिसकेका छन् । अहिले एमालेमा वरिष्ठ नेतासहित १५ जना पदाधिकारी छन् । माओवादीबाट कम्तीमा ६ देखि ७ जना थपिँदा भद्दा हुने भएकाले दुवै पार्टीका नेताहरू पदाधिकारी नराख्ने निष्कर्षमा पुगेका छन् । वरिष्ठ नेताहरूको मर्यादाक्रम भने दुवै अध्यक्षपछि रहने गरी मोटामोटी तय भएको छ ।
यसरी बन्दै छ स्थायी समिति र पोलिटब्युरो
केन्द्रीय कमिटीको आकारअनुसार स्थायी समिति र पोलिटब्यूरोको आकार तय गर्ने गरी कार्यदलले अनौपचारिक छलफल चलाइरहेको छ । ३ सय ५० जनासम्मको केन्द्रीय कमिटी बनेका अबस्थामा त्यसको एक तिहाइ १ सय सदस्यीयभन्दा केही ठूलो पोलिटब्युरो र ३५ सदस्यको अनुपातमा स्थायी समिति सदस्य बनाउने गरी कार्यदलले गृहकार्य गरिरहेको छ । माओवादी केन्द्रको स्थायी समिति ८३ सदस्यीय, पोलिटब्युरो २ सय ९९ सदस्यीय छ भने केन्द्रीय सदस्यको संख्या ४ हजार भनिए पनि यकिन तथ्यांक छैन । माओवादीसँग वास्तविक तथ्यांक नै नरहेका कारण पनि एकीकृत पार्टीको स्वरूप तय गर्न केही जटिलता देखिएको छ ।
जबकि, एमालेको स्थायी समिति कार्यकारी २२ सदस्यीय छ भने पदेन एक, आमन्त्रित तीनसहित २६ सदस्यीय मात्र छ । त्यस्तै, पोलिटब्युरो ६६ सदस्यीय छ । दुवै पार्टीका नेता घटुवा हुँदा असन्तुष्ट भएर अन्त कतै जाने वा निष्क्रिय बन्ने स्थिति नबनोस् भन्नेतर्फ कार्यदलका नेताहरूको विशेष ध्यान गएको छ ।
७ फागुनमा पार्टी एकीकरणका लागि दुई पार्टीबीच भएको सातबुँदे सहमतिअनुसार १० फागुनमा दुई कार्यदल गठन भएको थियो । जसअनुसार राजनीतिक कार्यदलमा एमालेबाट वरिष्ठ नेता माधवकुमार नेपालसहित भीमबहादुर रावल, सुवास नेम्वाङ, प्रदीप ज्ञवाली र रघुजी पन्त छन् । त्यस्तै, माओवादीबाट नारायणकाजी श्रेष्ठ, देव गुरुङ, शक्ति बस्नेत, फम्फा भुसाल र देवेन्द्र पौडेल छन् । त्यस्तै, अन्तरिम विधान र संगठनसम्बन्धी कार्यदलमा एमालेबाट ईश्वर पोखरेल, विष्णु पौडेल, गोकर्ण विष्ट, सुरेन्द्र पाण्डे, बेदुराम भुसाल र रघुवीर महासेठ तथा माओवादीबाट रामबहादुर थापा, जनार्दन शर्मा, वर्षमान पुन, गिरिराजमणि पोखरेल र मातृका यादव सदस्य छन् ।
उता, जनसंगठनहरूको एकीकरणसम्बन्धी एकसरो गृहकार्यसमेत सम्पन्न भइसकेको एक नेताले बताए । एमालेको २२ र माओवादी केन्द्रका २४ वटा जनसंगठन छन् । जनसंगठन एकीकरण गर्दा कुन जनसंगठनको नेतृत्व कसले लिने बाँडफाँट हुने गरी कार्यदलले खाका तयार भइसके पनि कार्यदलका सदस्यहरूले बाहिर ल्याउन चाहेका छैनन् । जनसंगठनहरूमा पार्टीको जस्तो संयुक्त नेतृत्व नहुने भएकाले मूल नेतृत्व एउटाले लिँदा अर्कोले उपाध्यक्ष, महासचिव र सचिवमा मिलाउने गरी छलफल चलिरहेको छ । पदाधिकारीहरूतर्फ भने अहिलेको संख्यामा दुई तिहाइ कटौती गरेर एक तिहाइ कायम गर्ने गरी छलफल चलिरहेको छ ।

Leave a Reply

... र यो पनि ...

चक्रपथ

नेकपाको विधान र नियमावली पारित

महाधिवेशन प्रतिनिधि बन्न ओली र प्रचण्डले पनि चुनाव लड्नुपर्ने काठमाडौं । नेपाल कम्युनिस्ट पार्टी (नेकपा) ले सबै कमिटीका पदाधिकारी र सदस्यले महाधिवेशन र अधिवेशनमा प्रतिनिधिमा- ...
पूरा पढ्नुहोस्

स्रष्टा र सिर्जना

अधैर्यको नमीठो स्वाद

आख्यान र गैरआख्यान दुवै विधाका किताबको अध्ययनमा गहिरो अभिरुचि राख्ने एक जना गम्भीर अध्येताले केही दिनअघि भने, ‘नेपाली लेखकहरूका एकपछि अर्को किताब फितला हुँदै गइरहेका छन् । लेखन- ...
पूरा पढ्नुहोस्

नयाँ पुस्तक

विडम्बनाको पर्दाफास

हरेक समाज केही न केही विडम्बना, समस्या र द्वन्द्वमा जेलिएका हुन्छन् । त्यस्तो समाजभित्र बाँचिरहेका मानिसहरूका अनेक कथाव्यथा हुन्छन्, अनगिन्ति पीर, सन्ताप, व्यथा, खुसी र उल्लास- ...
पूरा पढ्नुहोस्

छोटकरीमा