18th February 2019, Monday

E-budhabar

इजरायलका अनुभूतिहरू



इजरायलका अनुभूतिहरू

विदेशी भूमिमा पसिनाको मूल्य निर्धारण भइरहेको छ, केही दशकयता । देशभित्रै रोजगारीको स्थिति सिर्जना हुन सकेको भए पराई भूमिमा श्रम पोख्न जानेहरूको लस्कर सायदै लाग्थ्यो होला । देशमा रोजगारीका सुगम बाटाहरू नखोलिएपछि खाडी मुलुक, मलेसिया, जापान, इजरायललगायत अधिकांश देशहरूमा श्रम र सीप प्रदर्शन गर्न जानेहरू बर्सेनि बढ्दो छ । पछिल्लो समय भने इजरायलमा श्रम पोख्न जानेहरू पनि उल्लेख्य संख्यामा वृद्धि हुँदै छ । खासगरी, इजरायलका अशक्त, वृद्ध र मानसिक रुपले असम्पन्न व्यक्तिहरूका हेरचाह गर्न जाने महिला र इजरायलको कृषि क्षेत्रमा काम गर्न जाने पुरुषहरू बर्सेनि थपिँदै छन् ।
कतिपयले विदेशी भूमिमा श्रम गर्न जाँदा बटुलेका तीता–टर्रा अनुभूतिहरूलाई सतहमा ल्याउन चाहँदैनन् । तर, इजरायलका अशक्त वृद्धवृद्धाको हेरचाहमा गएका केही नेपाली महिलाले भने इजरायल बसाइका क्रममा देखेभोगेका अनुभूतिहरूलाई आफैंभित्र गुम्याएर राख्न चाहेनन् र त्यसलाई शब्दमा उन्न उचित ठाने । तिनै महिलाका बेग्लाबेग्लै अनुभूतिहरूका शब्दबुनाइबाट बुनिएको एउटा सुन्दर माला हो– ‘मृत सागरको सुस्केरा’ । यो अनुभूति–सँगालोमा इजरायलमा वर्षौं बिताएका १७ जना नेपाली नारीको कथाव्यथा समेटिएका छन् ।
इजरायल एक नयाँ देश हो । विश्वयुद्धका बेला हिटलरको ज्यादतीबाट बचेका यहुदीहरूले बसाएको देश । हिटलरकालीन समयमा उनका सेनाहरूद्वारा पीडित बनेका नागरिक अझै पनि इजरायलमा छन् र त्यस्ता नागरिकको हेरचाह गर्ने काममा नेपालीलगायत अरू देशका महिलाहरू लागिरहेका छन् । अधिकांश लेखिकाहरूले इजरायलमा केयरगिभरका रूपमा काम गर्दा आफूले पाएका हैरानी र दुःखका कथा त उनेका छन् नै, युद्धताका सिंगो परिवार गुमाएर पछि विभिन्न देशबाट इजरायल आई नयाँ जीवन सुरु गरेका नारी पात्रहरूदेखि अरू कैयांै पात्रहरूका हृदयविदारक कथा पनि उनीहरूले आफ्नो अनुभूति बिसाउने क्रममा पस्किएका छन् । कतिपय लेखिकाले भने युद्धका बाछिटाबाट बेलाबेला भिज्ने इजरायलको पीडा पनि उतारेका छन् । इजरायली र हमासबीच हुने युद्धका समयमा कति डर र त्रास झेल्नुपर्छ भन्ने पीडासमेत उतारिएको छ ।
भौतिक पूर्वाधारका हिसाबले सम्पन्न इजरायलमा आकर्षक तलब पाएर श्रम बेचिरहेका नारी–लेखिकाहरूले इजरायलको सम्पन्नता, भव्यताको बयान गरेका छन् नै, त्यत्ति नै देशमा रहेका सन्तान, नातागोतालाई सम्झिएर तड्पिएका पनि छन् । सन्तानको सम्झनामा उब्जिएका तड्पाइ र विदेशको आकर्षक तलबबीचको तालमेल मिलाउने क्रममा मानसिक तनावमा फस्नुपर्ने अवस्थालाई पनि लेखिकाहरूले शब्दबद्ध गरेका छन् । यसरी आफ्ना अनुभूति बिसाउने ती १७ लेखिकाहरूमा लक्ष्मी अनुरागी, भगवती बस्नेत, दीपिका भुसाल, दीया चापागाई, कल्पना सञ्जेल, कमला भण्डारी, मनीषा प्रसार्इं, निशा अर्याल, निशा क्षेत्री कटवाल, नुतन भुसाल, सावित्रा लुइँटेल घिमिरे, संगीता आचार्य, सानु खतिवडा, सीता अधिकारी, सुमित्रा घिमिरे दवाडी, सुनीता राई सुब्बा र बुद्धदेवी लिम्बू रहेका छन् ।
कृति ः मृत सागरको सुस्केरा
विधा ः अनुभूति–सँगालो
संयोजन ः भगवती बस्नेत
प्रकाशक ः बीएन पुस्तक संसार
पृष्ठ ः १९६
मूल्य ः ३००।–

Leave a Reply

Your email address will not be published. Required fields are marked *

... र यो पनि ...

चक्रपथ

ढुंगा खानी ‘बन्द गराउन’ प्रदेश सरकारलाई ध्यानाकर्षण

ShareTweet हेटौंडा । भीमफेदी गाउँपालिकाकी उपाध्यक्ष पार्वती रानाले भीमफेदी गाउँपालिकामा रहेको सिमेन्ट ढुंगा खानी बन्द गराउन प्रदेश सरकारलाई ध्यानाकर्षण गराएकी- ...
पूरा पढ्नुहोस्

स्रष्टा र सिर्जना

प्रशंसाको भागीदार बन्ने अवसर

ShareTweet स्थानीय तहको निर्वाचनपछि जनप्रतिनिधिहरूले स्थानीय सरकारको बागडोर सम्हाल्न थालेको करिब दुई वर्ष पुग्न लाग्दै छ । करिब–करिब आधा समय व्यतीत गरिसक्नै लाग्दा- ...
पूरा पढ्नुहोस्

नयाँ पुस्तक

बहुआयामिक सिर्जना

ShareTweet कुनै समय साहित्य वृत्तमा मुक्तक विधाले राम्रै स्थान पाएको थियो । मुक्तक विधाको ‘चार्म’ यति धेरै थियो कि काठमाडौंमा नभए पनि पोखरा, धरानजस्ता सहरका साहित्यप्रेमीहरू- ...
पूरा पढ्नुहोस्

छोटकरीमा