18th June 2019, Tuesday

जुर्मुराएको प्रतिपक्ष



हामीकहाँ प्रमुख प्रतिपक्षी दल पनि छ र ? यस्तो अनुभूति उब्जिँदै आएको लामै समय बितिसकेको थियो । करिब एक वर्षअघि नेपाल कम्युनिस्ट पार्टीको नेतृत्वमा सरकार गठन भएयता देशमा प्रमुख प्रतिपक्षी दल पनि छ भन्ने अनुभूति शून्यप्रायः नै थियो । तर, नेपाली कांग्रेसले प्रमुख प्रतिपक्षी दलको हैसियतमा सरकारको कार्यशैलीविरुद्ध देशव्यापी रूपमा सडक संघर्ष चर्काउने घोषणा गरेसँगै प्रतिपक्षी दलको अस्तित्व सतहमा देखिन पुगेको छ ।
हुन त नेकपाको सरकार गठन भएलगत्तै नेपाली कांग्रेसका सभापति शेरबहादुर देउवाले देशलाई अधिनायकवादको दिशातिर डो¥याउन सरकारको नेतृत्व गरेका कम्युनिस्टहरू अग्रसर भएको हुंकार नगरेका होइनन् । तर, सभापति देउवाको त्यस्तो हुंकार खासै वजनदार देखिएन । आफूले सत्ता गुमाउँदाको पीडाको अभिव्यक्ति ठाने, सबैले । लामो समय सत्तामा ढलीमली गरेको कांग्रेस वामपन्थीहरूले प्रचण्ड बहुमत ल्याई सरकार गठन गरेपछि झस्किनु स्वाभाविकै थियो । दीर्घकालसम्मै वामपन्थीहरूले सत्तामा कब्जा जमाउँछ कि भन्ने आशंका उब्जिनु पनि स्वाभाविकै थियो ।
वामपन्थी शक्तिको नेतृत्वमा सरकार गठन भएको एक वर्ष पुग्नै लाग्दा लामो समयदेखि सेलाएको कांग्रेसले प्रमुख प्रतिपक्षी दलको भूमिका निर्वाह गर्ने संकेत देखाएको छ । आन्दोलनका लागि कांग्रेसले पाएको मुख्य निहुँ हो– चिकित्सा शिक्षा विधेयक । आफ्नो असहमति र डा. गोविन्द केसीको अनशनका बाबजुद पनि संसदले केही दिनअघि चिकित्सा शिक्षा विधेयक बहुमतले पारित गरेपछि कांग्रेस सरकारविरुद्ध खनिन थालेको हो । संसद्को सर्वोच्चता र गरिमाअनुरूप लामो समयदेखि अड्किएर बसेको चिकित्सा शिक्षा विधेयक वामपन्थी सांसदहरूको बाहुल्य रहेको संसद्ले पारित गरेपछि कांग्रेसलाई आन्दोलन गर्ने बाटो खुलेको हो ।
चिकित्सा शिक्षा विधेयकबाहेक कांग्रेसले सरकारविरुद्ध घोषणा गरेको आन्दोलनका अरू मुद्दाहरू खासै प्रभावकारी छैनन् । नेपाली कांग्रेसका दिवंगत नेताद्वय गिरिजाप्रसाद कोइराला र सुशील कोइरालाको नाम जोडिएर खोलिएका दुईवटा अस्पताललाई संघीय सरकारमातहत राख्नुपर्ने माग कुनै ठूलो माग होइन । यो नितान्त प्राविधिक विषय हो । देश प्रादेशिक संरचनामा गइसकेपछि कतिपय संस्थाहरू प्रदेश सरकारको मातहतमा रहन्छन्, यो स्वाभाविक पक्ष हो । तर, यस्ता नितान्त प्राविधिक विषयलाई पनि कांग्रेसले आन्दोलनको एजेन्डामा समेटेको छ । कुनै मुद्दा नभइरहेको बेला सामान्य विषयलाई समेत मुद्दा बनाउन चर्काउन माहिर कांग्रेसले बखेडा झिक्ने नियतले मात्र यस्ता प्राविधिक विषयहरू उठाउन चाहेको प्रस्टै देखिन्छ ।
कांग्रेसले आन्दोलनको अर्को विषय चयन गरेको छ– देशव्यापी रूपमा बढिरहेको हत्या, हिंसा र बलात्कारका घटनालाई सरकारले नियन्त्रण गर्न नसक्नु । खासगरी, निर्मला पन्त बलात्कार र हत्यापछि सरकारविरुद्ध उब्जिएको माहोललाई अरू संस्था र समूहले भजाएजस्तै यो विषयलाई पनि कांग्रेसले भजाउन उपयुक्त ठानेको देखिन्छ । निश्चित रूपमा निर्मला पन्तको बलात्कारपछि हत्या भएको विषय सरकारका निम्ति टाउकोदुखाइको विषय बन्न पुगेको छ । अनुसन्धान कार्यलाई गहन रूपले अघि बढाए पनि अहिलेसम्म हत्यामा संलग्नहरू पत्ता लाग्न नसक्नु दुःखदायी पक्ष हो । मानवीय संवेदनासँग जोडिएको यो विषयलाई प्रमुख प्रतिपक्षी दलले उछाल्न खोज्नुलाई अन्यथा मान्न सकिँदैन ।
नेपाली कांग्रेसले वर्तमानमा उब्जिएका केही जल्दाबल्दा मुद्दा बोकेर सडक संघर्ष चर्काउने घोषणा गर्नुलाई उसको प्रतिपक्षीय भूमिकाको एउटा अंश मान्न सकिन्छ । तर, विभाजित मनस्थितिबीच उभिएको कांग्रेसले सरकारविरुद्ध प्रभावशाली आन्दोलन गर्लान् कुरामा भने शंकै देखिन्छ । बाह्य रूपमा कांग्रेसमा एकता देखिए पनि भित्रभित्रै भने कांग्रेस एकजुट हुन सकिरहेको छैन । सभापति देउवाको प्रभुत्व कांग्रेसमा जसरी बढ्दै गइरहेको छ, त्यसले लामो समय नेतृत्वमा हावी कोइराला परिवारलाई तर्साइरहेको छ । कोइराला खेमामै रहे पनि वरिष्ठ नेता रामचन्द्र पौडेललाई आफ्नै समूहका मानिसहरूले विश्वासिलो नजरले हेर्दैनन् । पौडेललाई आफ्नो समूहको मोहरा बनाउने काम मात्र कोइराला खेमाले गरिरहेको कुरा जोकोहीले बुझ्ने विषय हो ।
यद्यपि, नेपाली कांग्रेसले प्रमुख प्रतिपक्ष दलले निर्वाह गर्नुपर्ने भूमिकाको प्रदर्शन गर्न ढिलाइ गरिरहेको थियो । अब भने आफ्नो भूमिका देखाउन मानसिकतामा कांग्रेस उभिएको छ, यसलाई स्वागत गर्नुपर्छ । सरकारले गलत दिशा र बाटो समाते त्यसलाई सच्याउने, सजग तुल्याउने र सही लिकमा हिँडाउन सचेत गराउने कार्यमा प्रतिपक्षी दलको भूमिका हुनुपर्छ । विध्वंसको बाटो नअँगाली सरकारलाई खबरदारी गर्ने कार्य प्रतिपक्षी दलले अपनाउँछन् भने त्यसलाई सकारात्मक नै ठान्नुपर्छ । त्यसका निम्ति कांग्रेसले गर्ने भनेको सडक संघर्षका दिनहरूसम्म पर्खिनै पर्ने हुन्छ ।

Leave a Reply

Your email address will not be published. Required fields are marked *

... र यो पनि ...

चक्रपथ

प्रधानमन्त्रीे युरोप भ्रमणमा

ShareTweet काठमाडौ । प्रधानमन्त्री तथा नेकपाका अध्यक्ष केपी शर्मा ओली जेठ २५ गतेदेखि युरोप भ्रमणमा छन् । उनी नौ दिनका लागि भ्रमणमा निस्केका हुन् । युरोपका स्विजरल्यान्ड,- ...
पूरा पढ्नुहोस्

स्रष्टा र सिर्जना

सफलताको सूत्र

ShareTweet एउटा लोक–सुगन्धको गीतले केही दिनयता प्रसिद्धिको शिखर छोएको छ । त्यो गीत हो, ‘गलबन्दी च्यातियो तिम्ले च्यातेर..।’ नेपाली ग्रामीण भेगको निम्न वर्गको ऐना देखिने- ...
पूरा पढ्नुहोस्

नयाँ पुस्तक

एउटा समाजसेवीको गाथा

ShareTweet एउटा प्रसिद्ध भनाइ छ, ‘इतिहासका निर्माता भनेका जनता हुन् तर जसको इतिहासमा कुनै नाम हुँदैन ।’ यसै कुरालाई अलि संशोधन गरेर बुझ्दा इतिहास त सबैको हुन्छ तर लेखिदिने- ...
पूरा पढ्नुहोस्

छोटकरीमा