२६ माघ २०७९, बिहीबार १३:२४ बुधवार साप्ताहिक, नयाँबानेश्वर, काठमाण्डौं

रास्वपालाई सरकारमा फर्काउने कोशिस जारी छ : उपमहासचिव ज्ञवाली

काठमाडौँ । सत्तारुढ नेकपा एमालेका उपमहासचिव प्रदीप ज्ञवालीले राष्ट्रिय स्वतन्त्र पार्टी (रास्वपा) लाई सरकारमा फर्काउने कोशिस जारी रहेको बताएका छन् ।

आज बिहीवार पार्टीको सचिवालय बैठकपछि सञ्चारकर्मीसँग बोल्दै उपमहासचिव ज्ञवालीले पूर्व सहमतिअनुसार गृह मन्त्रालय राष्ट्रिय स्वतन्त्र पार्टीलाई नै दिएर सरकारमा राखिरहनु पर्नेमा जोड दिए । उनले भने, राष्ट्रिय स्वतन्त्र पार्टीले सरकार छोड्ने परिस्थिति हुनु निश्चय नै दुःखद विषय हो । यसमा समीक्षा हुँदै गर्ला । त्यो पार्टीका सभापति रवि लामिछानेजीले नागरिकता पुनः प्राप्तिको सन्दर्भमा केही प्रक्रियागत त्रुटि गर्नुभएको कारणले उहाँको पद रिक्त हुन गयो । त्यसले उत्पन्न भएको समस्या देखिन्छ ।

उनले भने, तर हामीले पुस १० गते यो नयाँ कोर्स निर्माण गरिरहँदा र पछि मन्त्रीमण्डल विस्तार गरिरहँदा जुन ढङ्गले शक्तिको बाँडफाँट गरेका थियौँ, त्यस हिसाबले गृह मन्त्रालय स्वतन्त्र पार्टीलाई दिइनुपथ्र्यो भन्ने हामीलाई लाग्छ । त्यसो गरेर भए पनि उहाँहरूलाई सरकारमा होल्ड गरिराख्नुपथ्र्यो । व्यक्ति कसलाई पठाउनु हुन्थ्यो, त्यो उहाँहरूको कुरा थियो । त्यसमा अलिकति असमझदारी देखियो । त्यसलाई आधार बनाएर उहाँहरू बाहिरिनु भएको छ । तर बाहिरिए पनि सरकारलाई उहाँहरूको समर्थन कायम नै छ । हाम्रो तर्फबाट उहाँहरूलाई त्यो विश्वासमा कायमै राख्ने र एउटा उपयुक्त वातावरण बनाएर सरकारमा फर्काउने कोशिस जारी छ ।

उपमहासचिव ज्ञवालीले जनता समाजवादी पार्टी र नागरिक उन्मुक्ति पार्टीलाई पनि सरकारमा ल्याउने कोशिस जारी भएको उनले बताएका छन् । फरक–फरक पार्टीको बीचमा गठबन्धन हुँदा असमझदारी देखिन सक्ने भन्दै ती असमझदारीलाई समाधान गर्न सकिनेमा उनले विश्वास व्यक्त गरे । उपमहासचिव ज्ञवालीले वर्तमान सत्तारूढ गठबन्धनलाई टिकाएर लैजानुपर्ने निष्कर्ष निकालेको पनि स्पष्ट पारे । एमालेले गठबन्धन टिकाउने सङ्कल्प गरेको पनि उनले उल्लेख गरे ।