३ फाल्गुन २०७९, बुधबार ०७:४३ बुधवार साप्ताहिक, नयाँबानेश्वर, काठमाण्डौं

सडक दुर्घटना कम गर्न ‘रोड सेफ्टी’ काउन्सिल बनाऔं : भट्टराई

३ फागुन, काठमाडौं । सत्तारूढ नेकपा (एमाले) का सांसद योगेश भट्टराईले सडक दुर्घटनामा परी नेपालमा धेरै युवाले ज्यान गुमाउँदै गएको बताएका छन् । आज (बुधबार) को प्रतिनिधिसभा बैठकमा उनले विश्वमा सडक दुर्घटना कम गर्न विभिन्न काम गरिएको बताएका छन् । उनले नेपालमा भने दुर्घटना बर्षेनी बढिरहेको भन्दै संसदको ध्यानाकर्षण गराए ।

उनले नेपालमा वार्षिक चार हजारभन्दा बढी मानिसको मृत्यु सडक दुर्घटनामा परेर हुने गरेको तथ्यांक प्रस्तुत गरेका छन् ।
‘नेपाल प्रहरीले पनि तीन हजार बढी भएको तथ्यांक देखाउँछ । यसबाट वार्षिक ३ प्रतिशत जीडीपी गुमाएको तथ्यांक छ । यो डरलाग्दो तथ्यांक छ । दुईपांग्रे सवारी चालकको मृत्यु ५० प्रतिशत छ । सडक दुर्घटनाबाट युवा उमेर समूहका मृत्यु हुने गरेको छ, उनले भने ।

संयुक्त राष्ट्रसंघ ‘रोड सेफ्टी’ र मृत्युदर घटाउन लागिपरेको भए पनि नेपालमा बढिरहेको उनले उल्लेख गरे । उनले रोड सेफ्टिी ऐन ल्याउने र रोड सेफ्टी काउन्सिल बनाउन ढिला गर्न नहुनेमा जोड दिए । आज हामी सडक विभागले सडक बनाएर उसैले क्वालिटी जाँच्छ, यातायात विभागले लाइसेन्स दिएर उसैले जाँच गर्छ । यो व्यवस्था विश्वमा छैन । रोड सेफ्टी काउन्सिल बनाउनु पर्छ भनेर हामीले भनिरहेका छौँ, उनले भने, नियमको संशोधन गर्ने, रोड सेफ्टी ऐन ल्याउने, काउन्सिल बनाउनेलगायत काम गर्नुपर्छ ।