७ फाल्गुन २०७६, बुधबार ०८:१५ बुधवार साप्ताहिक, नयाँबानेश्वर, काठमाण्डौं

चौरजहारीमा दुई सल्लाहकारबीच झन्डै…

काठमाडौं । नेपाल कम्युनिस्ट पार्टी (नेकपा) का अध्यक्ष तथा प्रधानमन्त्री केपी शर्मा ओलीका सल्लाहकार र अर्का अध्यक्ष पुष्पकमल दाहाल ‘प्रचण्ड’का प्रेस सल्लाहकार विष्णु सापकोटा जुगलबीच एक सार्वजानिक कार्यक्रममै झन्डै हात हालाहालको परिस्थिति सिर्जना भएको छ । नेकपानिकट पत्रकारहरूको संगठन नेपाल प्रेस संगठनको कर्णाली प्रदेशले रुकुमको चौरजहारीमा गत आइतबार राखेको शपथग्रहण समारोहमा झन्डै हात हालहालको सम्भाव्य परिस्थिति तत्काललाई टरे पनि त्यो घटनाले दुई पार्टीबीचको एकताभित्रको चिसोपनालाई भने छरपस्ट बनाइदिएको छ ।
उक्त शपथ ग्रहण समारोहको प्रमुख अतिथि नेकपाका प्रदेश इन्चार्ज जनार्दन शर्मा थिए । कार्यक्रम बिहान ९ बजेका लागि बोलाइएको थियो । निर्धारित समयमै कार्यक्रमस्थल पुगेका शर्मा कार्यक्रम ढिला सुरु हुने भएपछि पछि आउने भन्दै राफ्टिङको अर्को कार्यक्रमतिर लागे । करिब ११ बजे कार्यक्रम सुरु भयो । जब प्रधानमन्त्रीको प्रेस सल्लाहकार तथा प्रचार विभाग उपप्रमुख सूर्य थापा बोल्न थालेपछि कार्यक्रमले अर्कै रूप लियो । कारण थियो, ‘महान् जनयुद्ध’ लेखिएको स्वागत द्वार । कार्यक्रमस्थल जाने बाटोमा ‘महान् जनयुद्ध’ लेखिएको स्वागत गेट थियो । यद्यपि, त्यो गेट कार्यक्रम आयोजकले बनाएको थिएन । त्यो देख्नासाथ असहज महसुस गरेका थापाले कार्यक्रमलाई सम्बोधन नै त्यही विषयबाट सुरु गरे । पार्टीको नीतिविपरीत यस्तो गेट किन बनाइयो भन्दै उनले जनयुद्धप्रति कटाक्ष गरे । मञ्चमै बसिरहेका प्रचण्डका प्रेस सल्लाहकार सापकोटाले थापाले गरेको कटाक्ष पचाउन सकेनन् । उनी थापाको अभिव्यक्तिप्रति आपत्ति जनाउँदै जुरुक्कै उठे र थापा बोलिरहेको पोडियमतर्फ लम्कन खोजे । उनीसँगै बसेका प्रेस संगठनकै नेता मनोज घर्तीमगरले सापकोटालाई तानेर सिटमा बसाले ।
घटना यत्तिमै सेलाएन । त्यतिन्जेल प्रमुख अतिथि शर्मा आइपुगेका थिएनन् । तर, उनलाई घटनाको सबै जानकारी भइसकेको थियो । पछि आएका शर्मा जब बोल्न थाले, उनले कसैको नाम नलिई थापाप्रति इंगित गर्दै रिसको भावमा २६ मिनेट खर्चिए । दुई पार्टीबीचको महान् एकताको सूत्रधार आफू भएको दाबी गर्दै उनले गोजीबाट पार्टीको विधान झिक्दै जनयुद्धको प्रसंग उल्लेख भएको सम्झाए । शर्मा बोलिसकेपछि थापाले आफूसँगै लगेको सरकारको दुई वर्षका उपलब्धि समेटिएको पुस्तिका शर्मालाई दिए । तर, त्यो पुस्तिका लिँदा पनि शर्माको रिस शान्त भएको थिएन । उनले पुस्तिका रिसाएर टेबुलमा राख्दा भुइँमा खस्यो । कार्यक्रमबाट बिदा हँुदा पनि उनी थापासँग हात नमिलाई हिँडे ।
त्यसो त त्यसको दुई दिनअघि सामाजिक सञ्जालमा प्रचण्डकै पहिलेका प्रेस संयोजक मनहरि तिमिल्सिना र थापाबीच चलेको दोहोरी सेलाएकै थिएन । प्रधानमन्त्रीको फेक आईडीमा आएका कतिपय प्रसंगलाई लिएर तिमिल्सिनाले प्रधानमन्त्रीको आइडीबाट यस्ता अश्लील सामग्री आउँदा उनका सल्लाहकार के हेरेर बसेका छन् भन्दै लेखेका थिए । यसमा तिमिल्सिनाको त्रुटि थियो, किनभने त्यो फेक आईडी थियो । जवाफमा थापाले यसमा प्रचण्डलाई पनि जोडेर दुष्टता र दुष्प्रचारको पनि हद हुन्छ भन्दै लेखे, ‘…यति साह्रै रुवाबासी नगर्ने कि खुमलटारको दानापानी र संरक्षणमा । पहिले लाजिम्पाटबाट आफ्नै हर्कतका कारण निष्काशित भएको सम्झने कि !’ पहिले पनि उच्छृंखलता देखाएपछि तिमिल्सिनालाई ओलीकै आग्रहमा प्रचण्डले सचिवालयबाट हटाएको बताइन्छ ।
यो त पुरानो कुरा भयो । तर, पार्टी एकतापछि मातहतका जनवर्गीय संगठनको समेत एकता भएर राखिएको पहिलो कार्यक्रम अर्थात् शपथग्रहण कार्यक्रममै नेताहरूले देखाएको यो रमिताले एकता प्रक्रिया नै कतै दुर्घटनामा पर्ने त होइन भन्ने आशंकालाई चाहिँ बलियो बनाएको छ ।