२२ कार्तिक २०७८, सोमबार ०२:०८ बुधवार साप्ताहिक, नयाँबानेश्वर, काठमाण्डौं

द्धिपक्षीय व्यापार सम्बन्धलाई व्यापक बनाउन अमेरिका, भारत सहमत

वासिङटन । अमेरिका र भारत द्धिपक्षीय व्यापार सम्वन्धको दायरालाई अझ व्यापक र फराकिलो बनाउन सहमत भएका छन् । अमेरिकी व्यापार प्रतिनिधि काथेरिन ताइ र भारतीय बाणिज्य तथा उद्योग मन्त्री पियुस गोयलबिच भएको भर्चुअल छलफलमा यस्तो सहमति भएको हो ।

आगामी नोभेम्बर २२ र २३ मा नयाँदिल्लीमा हुने बैठकमा दुई देशवीचको व्यापार सम्वन्धलाई अझ कसरी व्यापक बनाउने भन्ने उपायका सन्दर्भमा अझ फराकिलो तरिकाले छलफल गर्न र भविष्यमा अमेरिका –भारत व्यापार नीति लाई अझ उन्नत बनाउने प्रतिवद्धता दुवै नेताले व्यक्त गरेको अमेरिकी व्यापार प्रतिनिधि ताइद्धारा जारी विज्ञप्तीमा जनाईएको छ ।

दुई नेताबिच विश्व व्यापार संगठनको आगामी मन्त्रीस्तरीय सम्मेलनलाई कसरी उपलब्धीमूलक बनाउने भन्ने उपायहरुका बारेमा पनि छलफल भएको जनाइएको छ । विश्व व्यापार संगठनको १२ औं मन्त्रीस्तरीय बैठक गत जुनमा काजिकास्तानमा बस्ने भनिए पनि कोभिड १९को महामारीका कारण स्थगित गरिएको थियो ।

यो मन्त्रीस्तरीय बैठक विश्व व्यापार संगठनको सबैभन्दा माथिल्लो निर्णयकर्ता निकाय हो । उक्त बैठकमा मन्त्रीहरुसहित संगठनका १६४ जना उच्च अधिकारीहरु सहभागी हुन्छन् । संगठनको बैठक प्रत्येक दुई वर्षमा बस्ने गर्छ । पहिलो बैठक १९९६ मा सिंगापुरमा सम्पन्न भएको थियो भने पछिल्लो ११ औं बैठक २०१७ मा अर्जेन्टिनामा बसेको थियो । (एजेन्सी)