२ फाल्गुन २०७७, आईतवार ०८:०४ बुधवार साप्ताहिक, नयाँबानेश्वर, काठमाण्डौं

संसद विघटनविरुद्धको मुद्दामा आज जवाफी बहस हुदै

काठमाडौं । प्रतिनिधिसभा विघटनविरुद्ध दायर निवेदनमा आज आइतबार बाट रिट निवेदकले जवाफी बहस गर्दैछन् ।

प्रधानमन्त्री केपी शर्मा ओलीका तर्फबाट कानुन व्यवसायीले बिहीबार बहस सकेका थिए । उनका तर्फबाट कानुन व्यवसायीहरुले उठाएका प्रश्नको जवाफ दिने गरी रिट निवेदकहरुले आजबाट बहस गर्नेछन् ।

प्रधानन्यायाधीश चोलेन्द्रशमसेर राणाले बढीमा पाँच जना अधिवक्ताले मात्र रिट निवेदकका तर्फबाट उठेका प्रश्नको जवाफ दिन आग्रह गरेका छन् । तर, निवेदकहरूले भने धेरै अधिवक्ताले जवाफ दिन पाउनुपर्ने माग गरेका छन् ।

रिट निवेदकहरुले संविधान विपरित प्रधानमन्त्री ओलीले प्रतिनिधिसभा विघटन गरेको दाबी गरेका छन् भने प्रधानमन्त्रीका तर्फबाट बहस गर्न कानुन व्यवसायीले भने संसदीय व्यवस्थामा प्रधानमन्त्रीलाई प्रतिनिधिसभा विघटन गर्ने विशिष्ठ अधिकार हुने जिकिर गरेका छन् ।

प्रतिनिधिसभा विघटनविरुद्धको मुद्दामा रिट निवेदकको तर्फबाट ७२, सरकारको तर्फबाट ४९ र सभामुखको तर्फबाट ३ जना गरि १ सय २४ जनाले बहस गरेका छन् । प्रधानमन्त्री ओलीको सिफारिसमा राष्ट्रपति विद्यादेवी भण्डारीले पुष ५ गते प्रतिनिधि सभा विघटन गरी वैशाख १७ र १७ गते मध्यावधी निर्वाचन गर्ने घोषणा गरेका थिए ।