२४ असार २०८०, आईतवार ०७:१३ बुधवार साप्ताहिक, नयाँबानेश्वर, काठमाण्डौं

संसदको अवरोध हटाउन प्रधानमन्त्रीले थाले संवाद

२४ असार, काठमाडौं । संघीय संसदका दुवै सदनको अवरोध हटाउन सत्तापक्ष र प्रमुख प्रतिपक्षी दलका शीर्ष नेताबीच छलफल भएको छ । आज (आइतबार) नेकपा माओवादी केन्द्रका अध्यक्ष समेत रहेका प्रधानमन्त्री पुष्पकमल दाहाल ‘प्रचण्ड’, नेपाली कांग्रेस सभापति शेरबहादुर देउवा र एमाले अध्यक्ष केपी शर्मा ओलीबीच सिंहदरबारमा भेटवार्ता जारी छ ।

प्रधानमन्त्री प्रचण्डले हालै दिएको एक अभिव्यक्तिको विषयलाई लिएर प्रमुख प्रतिपक्षी एमालेले संसद अवरुद्ध गरिरहेको छ । एमालेले प्रधानमन्त्रीको राजीनामा माग गर्दै संसद अवरोध गर्दै आएको छ ।

प्रतिनिधिसभाको बैठक आइतबार दिउँसो १ बजे बोलाइएको छ भने राष्ट्रियसभाको बैठक सोमबार बिहान ११ बजे बोलाइएको छ । आजको राष्ट्रियसभा वैठक एमालेको अवरोधका कारण स्थगित भइसकेको छ । एमालेको अवरोधका कारण माथिल्लो सदन राष्ट्रियसभाबाट अझै पनि आगामी आर्थिक वर्षको बजेट पारित हुन सकेको छैन ।