14th August 2018, Tuesday

E-budhabar

आन्तरिक कलहका कारण महासमिति अन्योलमा



काठमाडौं । भदौभित्र गर्ने भनिएको नेपाली कांग्रेसको महासमिति बैठक अनिश्चित भएको छ । गत जेठमा बसेको केन्द्रीय कार्यसमितिको बैठकले असारमा जिल्ला सभापतिहरूको भेला र भदौभित्रमा महासमिति बैठक बोलाउने निर्णय गरेको थियो । सो निर्णयबमोजिम सभापतिहरूको भेला सम्पन्न भए पनि त्यसयता पार्टीभित्र चुलिएको विवादले महासमितिलाई अनिश्चित बनाएको छ ।
स्रोतका अनुसार सभापति शेरबहादुर देउवा महासमिति बैठक कम्तीमा एक महिना भने पनि पर सार्ने मुडमा छन् । अहिले एक महिना सार्ने भन्ने त्यसपछि दसैंतिहारजस्ता चाडबाड देखाउने र महासमितिलाई दसैंपछि मात्र बोलाउने तयारीस्वरूप उनले तयारी थालेको बुझिएको छ । महासमिति बैठक सार्ने वातावरण बनाउन उनले निकट सहयोगीहरूलाई गोप्य सर्कुलर गरिसकेको बताइन्छ । पछिल्लो समयमा अधिवेशन सम्पन्न भएका भ्रातृ संस्थामा पराजित भएपछि देउवा तनावमा भएको बुझिएको छ । भ्रातृ संस्थाको निर्वाचन परिणामबाट पार्टीभित्रैबाट आफू घेराबन्दीमा परेको निष्कर्षमा उनी पुगेको बताइन्छ । त्यसमाथि महाधिवेशनमा साथ दिएको कृष्णप्रसाद सिटौला समूहले अहिले साथ छाडेपछि यही अवस्थामा महासमिति बोलाउँदा आफ्नै लागि प्रत्युत्पादक हुने देउवाको बुझाइ रहेको बताइन्छ । पार्टीमा अलि बढी अर्थ राख्ने भ्रातृ संस्था नेविसंघ र महिला संघ हुन् । यी दुवैमा नेतृत्व देउवा समूहकै छ । नेतृत्व भए पनि नेविसंघमा देउवा समूह अल्पमतमा छ । त्यहाँभित्रको विवाद यति छताछुल्ल छ कि असन्तुष्ट समूहले भदौ अन्तिममा मिति तोकेरै महाधिवेशन डाकेको छ । महिला संघभित्र पनि तीव्र विवाद छ । एकातिर आफैंले गराएका धेरै भ्रातृ संस्थामा भएको हार, आफ्ने नेतृत्वले जितेका भ्रातृ संस्थामा पनि चरम विवाद साथै अर्कातिर पार्टीको समीकरणमा पनि एक्लै भएको अवस्थामा महाधिवेशन गर्दा झन् कमजोर हुने उनका निकटस्थहरूले सुझाएको बुझिएको छ । अर्को गुटका आफ्ना हुने कुरा भएन, आफ्नै गुटका पनि आरजु राणाको चुरीफुरी बढेको भन्दै बटारिएपछि देउवा झन् तनावले ग्रसित भएको बताइन्छ ।
सिटौला समूह बटारिएपछि यो बीचमा देउवाले रामचन्द्र पौडेललाई फकाउने केही प्रयत्न पनि गरेका थिए । त्यसबाट सिटौला सशंकित पनि भए । तर, सोमबार पौडेलले अलग्गै भेला डाकेर आफू देउवासित नजिकिएको प्रस्ट पारेका छन् । सो भेलामा सिटौला समूह पनि आउने भनिएको थियो, तर सो समूहका कोही पनि गएनन् । गत हप्ता देउवासँग अलिक नजिकिएको समाचार बाहिर आएपछि पौडेललाई गलाउन सिटौला अनुपस्थित भएको बताइन्छ । यति मात्र होइन, गत वर्ष पार्टी एकता गरेर आएका विजय गच्छदारले पनि देउवालाई चाँडै एकताको मर्मअनुसार जिम्मेवारी बाँडफाँट नगरे चुप लागेर नबस्ने भन्दै चेतावनी दिइसकेका छन् । यी सबै चुनौती चिर्न नसकिने डरकै कारण महासमिति बैठक सार्न लागिएको स्रोतको दाबी छ ।

 

Leave a Reply

... र यो पनि ...

चक्रपथ

सरकारको बाटोमा अदालतको तगारो

काठमाडौं । दुई तिहाइ बहुमत प्राप्त स्थिर सरकारलाई आफ्नो ढंगले काम गर्न अदालतले पटकपटक तगारो लगाएको छ । अघिल्लो सरकारले राजनीतिक आस्थाका आधारमा जाँदा जाँदै गरेका नियुक्तिहरू- ...
पूरा पढ्नुहोस्

स्रष्टा र सिर्जना

साउने प्रतिज्ञा

हरेक दिन दाह्री–जुँगा मिलाएर हिँड्ने एकजना साथी दाह्री–जुँगा पालेको अवस्था देखेपछि प्रश्न गर्न मन लाग्यो, ‘दाह्री–जुँगा पाल्न थाल्नुभएछ नि, किन यस्तो विरूप हो ?’ ती साथीले जवाफ- ...
पूरा पढ्नुहोस्

नयाँ पुस्तक

समस्याको उठान

देश, समाज र परिवारभित्र दैनन्दिन रूपमा अनेक घटनाहरू जन्मिरहेका हुन्छन् । निश्चय नै, त्यस्ता घटनाहरूले मानिसको जीवनमा सानाठूला प्रभाव पार्दछन् । कुनै घटनाको प्रभाव क्षणिक हुन्छन्- ...
पूरा पढ्नुहोस्

छोटकरीमा