15th August 2018, Wednesday

E-budhabar

प्रहरीको पेट्रोल पम्पमा व्यापक अनियमितता



 काठमाडौं । प्रहरी कल्याण कोषअन्तर्गत सञ्चालित नेपाल प्रहरीको पेट्रोल पम्पमा पुनः अनियमितताले जरो गाडेको छ । प्रहरी निरीक्षक विष्णु पोखरेल प्रमुख रहेको नक्सालस्थित प्रधान कार्यालय परिसरको पम्पमा निरीक्षक पोखरेलद्वारा नै संस्थागत घुसखोरीलाई मलजल गरिरहेको बताइन्छ । आफू सो पम्पको नेतृत्व गर्न प्रहरीभित्रको सबैभन्दा घुस्याहा युनिट लेखाबाट आइपुगेको तीन महिना मात्र हुन लागेको बेला उनले घूसको सबै च्यानल पहिल्यै बुझिसकेकाले सुरुवातीबाटै अनियमिततामा जोड दिएको बताइन्छ । उनले मातहतका कर्मचारीहरूलाई अनियमितता गरी सक्दो रकम बुझाउन निर्देशन दिएको थाहा भएको छ । स्मरणीय छ, प्रहरीभित्र पनि कल्याणकारी कोषअन्तर्गत पेट्रोल पम्पको जागिरलाई आकर्षक र मालदार मानिन्छ । पम्पमा विगत लामो समयदेखि तिनै कर्मचारीहरू रहेकाले पनि उनीहरूले नयाँ हाकिम आउनासाथ सेटिङ मिलाएर दिनदिनै रकम बुझाउने गरेको बताइन्छ । त्यहाँ कार्यरत कर्मचारीहरूमध्ये आलोपालोअनुसार केही कर्मचारीले हरेक दिनजसो थानकोटमा पेट्रोल लिन जानुपर्छ भने केहीले चाहिँ पम्पमा बसेर पेट्रोल भरिदिने तथा अन्य खटनपटन गर्ने काम गर्छन् । इन्सपेक्टर पोखरेललाई राम्रो रकम नियमित रूपमा बुझाउने गरेकाले त्यहाँका कर्मचारीहरू उनका प्रिय भएको स्रोतको दाबी छ । अझ विशेषगरी पम्पको कम्युटर शाखामा कार्यरत दिलीप कार्कीको भूमिका बढी शंकास्पद रहेको बताइन्छ । उनले सबै कर्मचारीलाई ‘हाकिमसाबलाई पैसा बुझाउनुपर्छ जसरी पनि मिलाउनू’ भन्दै रकम संकलन गर्ने र बेलुका बाँडचँुड गर्ने गरेको बताइएको छ । कार्कीलाई त्यहाँको इन्चार्ज पोखरेलले संरक्षण गरेकैले खुलेआम घुसखोरीलाई प्रश्रय दिएको बताइन्छ । पम्पमा उनीहरूले उपत्यकामा भएका प्रहरी कार्यालयबाट इन्धन नै नहाली कुपनलाई आधा रकम दिने र उक्त तेल अन्य सर्वसाधारणलाई बेचेर नगदमा कन्भर्ट गरी पैसा खल्तीमा हाल्ने गर्दै आएको आरोप छ । त्यस्तै, तेलै नहालीकनै तेल घटेको भन्ने बहाना बनाएर रकम असुल्ने गर्दै आएको बताइएको छ । त्यस्तै, समाजका उच्च पदस्थ व्यक्तिहरू तथा इन्सपेक्टर पोखरेलका आफन्त र साथीभाइलाई भने रकम नै नतिरी हरेकपटक तेल हाल्ने प्रबन्धसमेत गरिएको बताइन्छ । प्रहरीबाट अवकाश भइसकेका भूपू प्रहरीहरू पनि विगतमा ठूलो संख्यामा करारमा कार्यरत रहेकामा पछिल्लो समय तिनीहरूलाई भने हटाइएको छ । पहिले कल्याण महाशाखाका प्रमुख भई एसएसपी रहेका पवन खरेल अहिले डीआइजी भई प्रबन्ध महाशाखाको प्रमुख रहेका छन् । यता, प्रहरी कार्यालयका सहयोगी चेतराज न्यौपानेलाई पेट्रोलपम्पमा ल्याइएको छ । त्यसका लागि डीआइजी खरेलले भनसुन गरेका थिए । पोखरेलले अहिले मासिक ६० हजार रुपैयाँसम्म अतिरिक्त आम्दानी गर्ने गरेको बुझिएको छ । यसअघि चिन्तामणि बुढाथोकी पेट्रोलपम्पको प्रमुख रहेकामा उनी डीएसपी बढुवा भई गएपछि पोखरेल आएका हुन् । सेयर बजारमा अत्याधिक लगानी गर्ने उनी पनि अकुत सम्पत्ति कमाइसकेका व्यक्ति हुन् । उनले आफ्ना छोराहरू भारतमा लगेर पढाएका छन् ।

Leave a Reply

... र यो पनि ...

चक्रपथ

वैकल्पिक ऊर्जामा कार्यकारीका लागि दौडधुप तीव्र

काठमाडौं । दर्जनौं दातृ संस्थाहरूको अर्बौं रकम ब्रह्मलुट गर्ने संस्था वैकल्पिक ऊर्जा प्रवद्र्धन केन्द्रको प्रमुख हुन तीव्र दौडधुप सुरु भएको छ । चार वर्षअघि केन्द्रको कार्यकारी- ...
पूरा पढ्नुहोस्

स्रष्टा र सिर्जना

अब खुल्दैन ‘साहित्य संसार’को दैलो !

‘बाबा ! म त धेरै बाँच्दिनँ, डाक्टरले १० वर्षको समय दिएको छ ।’ मिर्गाैला प्रत्यारोपणपछि नियमित डायलाइसिसका रहेको साहित्यकार एवं वरिष्ठ रेडियोकर्मी दाहाल यज्ञनिधिले भन्ने गर्नुहुन्थ्यो- ...
पूरा पढ्नुहोस्

नयाँ पुस्तक

सत्यापनको नजिक

आफ्नो जीवन–गाथा रच्ने इच्छा कसलाई हुँदैन र ? जीवनका अँध्यारा–उज्याला तस्बिरहरुलाई फ्रेममा टाँग्ने उत्साहले डोरिँदै समाजका प्रबुद्ध अनुहारहरुले आत्मकथा लेखिरहेका छन् । तर,- ...
पूरा पढ्नुहोस्

छोटकरीमा