१९ चैत्र २०७०, बुधबार ०८:०९ बुधवार साप्ताहिक, नयाँबानेश्वर, काठमाण्डौं

महाधिवेशनको तयारी तीव्र

काठमाडौं । आगामी जेठको अन्तिम साता नवौं महाधिवेशनको तयारीमा जुटेको नेकपा (एमाले)ले महाधिवेशनमा पेश गर्ने राजनीतिक प्रतिवेदनमाथिको प्रारम्भिक छलफल सिध्याएको छ । राजनीतिक प्रतिवेदनमा कुन–कुन विषय थप्नुपर्ने भन्नेमा केन्द्रीय सदस्यहरुले सुझावहरु दिइसकेपछि अध्यक्ष झलनाथ खनालसमक्ष पेश भइसकेको छ । अब अध्यक्ष खनालले मस्यौदा ल्याएपछि उक्त प्रतिवेदनले पूर्णता पाउने छ । राजनीतिक प्रतिवेदनमाथि एमालेले गएको चैत ३ गतेदेखि नै छलफल सुरु गरेको थियो ।
राजनीतिक प्रतिवेदनमाथिको छलफल टुंगिसकेपछि त्यसैको मार्गनिर्देशस्वरुप अरु प्रस्तावहरुमाथिको छलफल प्रारम्भ हुने एमालेले जनाएको छ । अबको केही दिनपछि नै संगठनात्मक सिद्धान्तसम्बन्धी प्रस्तावमाथि छलफल हुनेछ भने त्यसपछि विधान संशोधन प्रस्तावमाथि छलफल हुनेछ । एमालेको महाधिवेशन आगामी २०७१ साल जेठ २४ देखि ३१ गतेसम्म काठमाडौंमा हुन लागिरहेको छ । यसअघि नै महाधिवेशनको तयारीका लागि महासचिव ईश्वर पोखरेलको संयोजकत्वमा ६३ सदस्यीय मुल व्यवस्थापन कमिटी गठन भई काम सुरु भइसकेको छ ।