४ बैशाख २०७१, बिहीबार ०७:१७ बुधवार साप्ताहिक, नयाँबानेश्वर, काठमाण्डौं

बाबुरामका भाइ रंगेहात

काठमाडौं । नेताको परिवारको सदस्य हुन पनि गाह्रो छ । आफूले राजनीति नगरे पनि नाम जोडिइहाल्छ । त्यसो नहुँदो त नेपाल विद्युत् प्राधिकरणका पाँचौं तहका कर्मचारी शिवप्रसाद भट्टराई समाचारको विषय हुने थिएनन् ।
भाइ भएर मात्रै होइन, आफ्ना दाजु बाबुराम भट्टराईसँग ठ्याक्कै अनुहार मिलेका कारण माओवादी युद्धका बेला शिव बेला–बेलामा दु:ख पाउँथे । ‘बाबुरामलाई नै भेटियो र अब बढुवा हुने भयो’ भन्दै प्रहरीका फिल्डमा खटिने अधिकारीले उत्साहका साथ उनलाई पक्राउ गर्थे । तर, जब उनी आफ्नै तालमा मस्त रहने विद्युत् प्राधिकरणका कर्मचारी हुन् र उनलाई दाजुसँग मतलब छैन भन्ने थाहा पाउँथे, तब हिस्स परेर छोड्थे ।
भर्खरै फेरि शिव पक्राउ परे । तर, दाजु प्रधानमन्त्री भइसकेर नयाँ शक्तिको बहसमा लागेका बेला किन उनलाई पक्राउ गरियो होला ? कारण चाहिँ लाजमर्दो छ । गत साता उनी आफू कार्यरत कार्यालयमा दिउँसै चालक र पियन जम्मा गरेर तास खेल्दै रहेछन् । त्यतिबेलै उनकै कार्यालयबाट प्रहरीलाई खबर गएछ– ‘सरकारी कार्यालयभित्रै तास खेलिँदैछ ।’ प्रहरी तुरुन्तै आयो र दुई/चार हजार रुपियाँ, म्यारिज खेलिरहेका पाँच कर्मचारी, चार रमिते, तीन जोर ताससहित सबैलाई उठायो । शिव कार्यरत रत्नपार्क वितरण केन्द्रका प्रमुख भानुभक्त भट्टराईकहाँ पनि यो खबर पुग्ने नै भयो । पछि लाज हुने भयो भन्दै प्रहरीलाई हारगुहार गरेर उनलाई तीन घन्टामा फिर्ता ल्याइयो भने अरूलाई एक रात उतै राखियो ।
शिवले तास खेलेको पहिलो पटक थिएन र पक्राउ पनि बेला–बेलामा परिरहन्छन् । दिउँसै मदिरापान गरेर कार्यालय आउने, लाए–अह्राएको काम नगर्ने र ड्राइभर–पियन जम्मा गरेर तास खेल्ने उनको पुरानै बानी भए पनि बाबुरामको भाइ भनेर जागिर खाइदिइहाल्ने हिम्मत कसैले गरेको छैन ।