२९ श्रावण २०७१, बिहीबार ०९:१८ बुधवार साप्ताहिक, नयाँबानेश्वर, काठमाण्डौं

बल्ल ताते सभामुख

काठमाडौं । सभामुख सुवासचन्द्र नेम्वाङले संसदीय समितिका सभापति चयनका लागि भदौ ४ गतेको समय तोक्नुभएको छ । संसद् अधिवेशन सुरु भएको छ महिना बित्दा पनि सभापति चयन नहुँदा ती समितिहरूको अध्यक्षता ज्येष्ठ सदस्यले सञ्चालन गर्दै आएका थिए ।
संसद् नियमावली अनुसार समितिका सभापतिहरूको निर्वाचन सभामुखले तोकेको मितिमा हुन्छ । निर्वाचनको मिति घोषणामा पनि राजनीतिक दलहरूको पर्खाइमा रहेका सभामुखले दलहरूबाट कुनै निर्णय नआएपछि हिजो भदौ ४ का लागि मिति घोषणा गर्नुभएको हो । पटक–पटकको प्रयासमा पनि प्रमुख दलहरूबीच समितिको नेतृत्वमा भागबन्डा नमिलेपछि सभामुखले साउन १६ गते सार्वजनिक लेखा समितिको निर्वाचन गराउनुभएको थियो । यो समितिको सभापति प्रमुख प्रतिपक्षले पाउने व्यवस्था बमोजिम एमाओवादीका जनार्दन शर्मा चुनिएका थिए ।
१३ वटा समितिमध्ये प्रमुख दलहरूबीच कांग्रेस/एमालेले ४–४ वटा, एमाओवादीले २ वटा, राप्रपा नेपाल र मधेसी दललाई एक/एक वटा दिने सहमति भए पनि कुन समिति कसले लिने भन्ने टुंगो लागेको छैन । व्यवस्थापिका–संसद्अन्तर्गत विधायन समिति, कृषि तथा जलस्रोत समिति, विकास समिति, राज्य व्यवस्था समिति, सार्वजनिक लेखा समिति, अर्थ समिति, अन्तर्राष्ट्रिय सम्बन्ध तथा श्रम समिति, उद्योग वाणिज्य तथा उपभोक्ता हित सम्बन्ध समिति, महिला, बालबालिका, ज्येष्ठ नागरिक र समाज कल्याण समिति तथा संसदीय सुनुवाइ विशेष समिति र सुरक्षा विशेष समिति छन् ।