५ भाद्र २०७१, बिहीबार ०६:३९ बुधवार साप्ताहिक, नयाँबानेश्वर, काठमाण्डौं

वैद्य बाको गर्जन

देशका अरू राजनीतिक दलहरू एक वर्षभित्रै संविधान बनाउन कस्सिएर लागिपरेका छन् । आगामी माघ ८ गते नै संविधान ल्याउन अहोरात्र जुटिरहेका छन् । नेपालका राजनीतिक दलहरूमा देखिएको हनुमान–उत्साह हेर्दा निर्धारित मितिमा नै संविधान आउला कि भन्ने आशा तीव्र रूपमा बढेको छ ।
तर, मोहन वैद्य बा भने आफूहरूलाई सहमत नगराई संविधान ल्याए च्यात्ने धम्की वितरण गर्न थालिसकेका छन् । केही दिनअघि धनुषाको एउटा कार्यक्रममा पुग्दा उनी कुर्लिएछन्– ‘हेरौं, दलहरूले कसरी संविधान ल्याउँदा रहेछन् ? हामीलाई पाखा लगाएर संविधान ल्याए च्यातेर फ्याँकिन्छ ।’ वैद्य बा किन यसरी रातारात क्षुब्ध हुन
पुगे ? उनले संविधान च्यात्ने कुरा
किन उठाए ?
नौ/दस महिना पहिले देशमा संविधानसभाको निर्वाचन हुँदा वैद्य बा र उनका चेलाचपेटाहरूले निर्वाचन बहिष्कार गरेको कुरा सबैलाई हेक्का नै छ । तर, निर्वाचन बिथोल्न जतिसुकै हर्कत गरे पनि इतिहासमै धेरै जनताले मतदानमा सहभागिता जनाए । वैद्य बाको समूहले बहिष्कार गर्ने भनिए पनि एकाधबाहेक हिंसात्मक घटना भएनन् । हजारौं जनताले निर्वाचनमा सहभागिता जनाएपछि बहिष्कारवादीहरूलाई जनताले नै बहिष्कार गरेको कुरा
विदितै थियो ।
त्यत्रा जनताले चुनेर पठाएका प्रतिनिधिहरूले बनाउन लागेको संविधान च्यात्ने दुस्साहस वैद्य बामा कसरी पलाउन सकेको होला ? अरे, बाबा † आफूहरूलाई पाखा लगाए रे † कसले पाखा लगायो उनीहरूलाई ? निर्वाचनमा आउन त्यत्रो बिन्तिभाउ बिसाउँदा पनि बहिष्कारको स्वाङ रच्ने त वैद्य बाहरू नै हुन् । बेलामा बुद्धि नपुर्‍याउने, अहिले आएर फ्वाँफ्वाँ गरेर समस्याको समाधान निस्कन्छ ? वैद्य बाको बुद्धिको घैंटोमा बिर्को नलाओस् भन्ने चाहना नेपाली जनताले राख्दा अन्यथा नठहरिएला ।