३१ आश्विन २०७१, शुक्रबार ०७:५३ बुधवार साप्ताहिक, नयाँबानेश्वर, काठमाण्डौं

भविष्यवाणीमै सीमित

अहिले देशका सबै राजनीतिक दलका नेताहरूको एउटै सुगारटाई रहेको छ । सबैले भनिरहेका छन्– आगामी माघ ८ गते संविधान जारी हुन्छ । ‘टाउको टेकेर हुन्छ कि घुँडा धसेर हुन्छ हामी जसरी भए पनि संविधान जारी गरेरै छाड्छौं’ भनिरहेका छन् नेताहरू । तोकिएको समयमा संविधान जारी गर्ने राग सबै दलका नेताहरूले एकोहोरो अलापिरहेका छन् । यस्तो लाग्छ, संविधान नामक नयाँ ठेली नेपाली जनताको हातमा अबको दुई चार महिनापछि नै पर्नेछ ।
देशका प्रमुख राजनीतिक दलका ठूलादेखि साना तहसम्मका नेताहरूले ‘माघ ८’ को रटान एकोहोरो लगाइरहेका बेला एक जना भविष्यवेत्ताले भने भविष्यवाणी गरिहाले– ‘माघ ८ मा संविधान आउने कुनै सम्भावना छैन ।’ ती भविष्यवेत्ता हुन्, नेपाल मजदुर किसान पार्टीका सदाबहार अध्यक्ष नारायणमान बिजुक्छे ‘रोहित’ । उनले केही दिनअघि सगौरव तोकिएको समयमा संविधान नबन्ने भविष्यवाणी गरेर आफूलाई एक अब्बल भविष्यवेत्ताका रूपमा परिचित तुल्याएका छन् ।
हुन पनि, अबका दिनहरूमा रोहित महोदयले भविष्यवाणी नगरेर के गरुन् त ? उनको काम नै भविष्यवाणी गर्नुमा सीमित हुने देखिन्छ । खुम्चिँदै–खुम्चिँदै भक्तपुरमा मात्र सीमित रहेको आफ्नो पार्टी अब विस्तारित हुने सपना उनले सायदै देखेका होलान् । बरु एउटा के सुझाव दिन सकिन्छ भने, अबदेखि पार्टी–सार्टीको काम गर्न छाडेर उनले भक्तपुरकै कुनै चोक वा पाटीतिर एउटा सानोतिनो ज्योतिषकेन्द्र खोल्दा उचित हुन्छ । र, त्यही ज्योतिषकेन्द्रबाट राजनीतिको मात्र होइन, अन्य क्षेत्र र व्यक्तिहरूका पनि भविष्यवाणी गरे उनको पेसा निकै नै फस्टाउने कुरामा कुनै दुईमत हुन सक्दैन । तसर्थ, आगामी माघ ८ गते संविधान जारी नहुने भविष्यवाणी गरेर उनले आफूलाई एक भविष्यवेत्ताका रूपमा जसरी दराएका छन्, त्यसलाई पेसा नै बनाउनु उनका लागि हितोचित देखिन्छ ।