२६ मंसिर २०७१, शुक्रबार ०८:३६ बुधवार साप्ताहिक, नयाँबानेश्वर, काठमाण्डौं

गच्छदार र सत्ता

मधेसी नेता हृदयेश त्रिपाठीले सत्तारुढ दलका नेताहरूलाई केही दिनअघि ध्वाँस दिँदै भनेका थिए– ‘मधेसीहरूलाई सत्ताको काउकुति नलगाइयोस् ।’ उनले ठीकै भनेका जस्तो लागेको थियो । किनकि, मधेसी नेताहरू सत्ताको काउकुतिबाट विमुख भएको धेरै समय हुन लागिरहेको थियो । अझ, पछिल्लो पटक त उनीहरू सत्ताविहीन हुनु त्यति सुपाच्य र उचित कुरा थिएन ।
तर, त्रिपाठी महोदयले जे भने पनि अब भने मधेसी नेताहरूलाई सत्ताको काउकुति लाग्न थालेजस्तो देखिएको छ । सबभन्दा बढी काउकुति त अहोरात्र सत्ताकै वरिपरि घुम्ने मधेसी नेता विजयकुमार गच्छदारलाई लागेजस्तो देखिन्छ । केही दिनयता उनी त्यही काउकुतिको असरले हो वा अरू कुनै कारणले हो, ठाउँ–ठाउँमा पुगेर हाँस्न थालेका छन् । केही दिनअघि मात्रै उनी बालकोट पुगेको खबर आयो । त्यही काउकुतिकै असरले हुनुपर्छ, बालकोटमा उनी मज्जाले हाँसेको कुरो बाहिर आयो । सत्ताले नहँसाउने मान्छे यो दुनियाँमा आखिर को नै छन् र ? तथापि, गच्छदार पनि सत्ताको सोपान चढ्ने अभियानमा लाग्नु र त्यसकै आनन्द लिँदै हाँस्नुलाई अन्यथा ठान्न मिल्दैन ।
हुन त, पहिला–पहिला गच्छदार र सत्ता एकअर्काको पर्यायवाचीजस्तै लाग्दथ्यो । जब सरकार गठनको कुरा उठ्थ्यो, त्यहाँ गच्छदार स्वत: गाँसिन आइपुग्थे । जसको सरकार बनोस्, उनले महत्त्वपूर्ण मन्त्रालयको जिम्मेवारी सम्हालेकै हुन्थे । उनको त्यो क्रम नेपालमा बहुदलीय व्यवस्था आएदेखिकै चलिरहेको थियो । अझ, मधेस आन्दोलनपछि मधेसीहरूको मसिहा बन्ने सौभाग्य उनले पाएपछि त मधेसीको नाममा पटक–पटक सत्तारोहण गर्ने ढोका उनलाई गज्जबले नै खुल्यो ।
त्यसैले, कसैले पनि गच्छदार र सत्ताबीचको दूरीलाई धेरै समयसम्म तन्काएर राख्न सक्दैनन् । न त गच्छदार नै त्यस्तो चाहन्छन् । आखिर, पानीमा बस्ने माछीलाई पानी भएन भने कस्तो हुन्छ ? हो, अहिले गच्छदार महोदयलाई त्यस्तै भइरहेको छ । र, हामी पनि कामना गरौं, निकट समयमै उनलाई सत्ताको शिखर चढ्ने सफलता प्राप्त होस् ।