२९ पुष २०७२, बुधबार ०८:३४ बुधवार साप्ताहिक, नयाँबानेश्वर, काठमाण्डौं

रोल्पाली कलाकार काठमाडौंमा सम्मानित

काठमाडौं । रोल्पामा जन्मिएर कलाकारिता क्षेत्रमा लागेका विभिन्न व्यक्ति काठमाडौंमा सम्मानित भएका छन् । शनिबार रोल्पा जलजला सेवा समाज काठमाडौंले राजधानीमा आयोजना गरेको कार्यक्रममा उनीहरू सम्मानित भएका हुन् ।
माघेसंक्रान्ति २०७२ को अवसर पारेर आयोजना गरिएको सांस्कृतिक कार्यक्रममा कलाकारहरू कुलानन्द गिरी, पवित्रा घर्ती, उदिराम खड्का, राधिका हमाललगायतका कलाकार सम्मानित भएका हुन् । गीत संगीतमार्फत महत्त्वपूर्ण योगदान पुर्‍याएका रोल्पाली कलाकारहरूलाई पूर्वमन्त्री एवम् राप्रपाका केन्द्रीय सदस्य बालाराम घर्तीमगरले सम्मान गरेका थिए ।
रोल्पालीहरूको भेटघाट भनिएको उक्त सांस्कृतिक कार्यक्रममा कलाकारहरू पवित्रा घर्ती, राधिका हमाल, उदिराम खड्कालगायतले आफ्ना प्रस्तुतिमार्फत सहभागी दर्शकलाई भरपुर मनोरञ्जन दिलाएका थिए । समाजका अध्यक्ष वसन्त रोका मगरको सभापतित्वमा सम्पन्न कार्यक्रमका प्रमुख अतिथि पूर्वमन्त्री बालाराम घर्तीमगर रहेका थिए । कार्यक्रममा पूर्वमन्त्री घर्तीले रोल्पालीहरू एकजुट हुनुपर्नेमा जोड दिएका थिए । यसरी रोल्पाबाट काठमाडौं आएर सम्पन्न गरिएको सांस्कृतिक तथा भेटघाट कार्यक्रम पहिलोपटक भएको आयोजकको भनाइ रहेको छ । कार्यक्रममा सहभागी रोल्पालीहरू यो कार्यक्रमबाट उत्साही भएका थिए । उनीहरूले यस्ता कार्यक्रमलाई निरन्तरता दिनसमेत आयोजकलाई आग्रह गरेका थिए । केही समयअघि मात्र जलजला सेवा समिति र रोल्पा सेवा समाज एकीकरण भएर रोल्पा जलजला सेवा समाज बनेको हो ।