२६ जेष्ठ २०७३, बुधबार ०५:५९ बुधवार साप्ताहिक, नयाँबानेश्वर, काठमाण्डौं

एकजना रोज्न किन यत्रो संकट ?

काठमाडौं । खुमबहादुर खड्का र विमलेन्द्र निधीमध्ये कसलाई उपसभापति बनाउने भन्ने संकटका कारण नेपाली कांग्रेसका सभापति शेरबहादुर देउवाले अझै पदाधिकारी नियुक्त गर्न सकेका छैनन् ।
देउवा आफ्नै चाहना र उनको पुरानो टिमका अधिकांशको सुझाव निधिलाई उपसभापति बनाउनेछ । तर, महाधिवेशन अघि केही व्यक्तिलाई साक्षी राखेर खड्कालाई दिएको वचन र भारतीय संस्थापनको दबाबका कारण उनले निधिलाई बनाउन सकेका छैनन् । स्रोतका अनुसार महाधिवेशन अघि देउवा, खड्का, अमरेशकुमार सिंह र एकजना भारतीय खुफिया एजेन्सीका प्रतिनिधि बसेर महाधिवेशनमा खड्काले देउवालाई सहयोग गर्ने र निर्वाचित भइसकेपछि देउवाले खड्कालाई उपसभापति मनोनीत गर्ने सहमति भएको थियो । तर, भर्खरै भ्रष्टाचार आरोपमा जेल सजाय काटेर निस्केको व्यक्तिलाई उपसभापति मनोनीत गर्दा सन्देश गलत जाने र सभापतिको प्रतिष्ठामै धक्का लाग्ने भन्दै त्यसो नगर्न पार्टीभित्रकै उनको पुरानो गुटले देउवालाई दबाब दिएको बुझिएको छ । कांग्रेसभित्र खड्का र निधि दुवै भारतपरस्त नेताका रूपमा चिनिन्छन् । तर, रमाइलो के छ भने भारतीय संस्थापन भारतीय जनता पार्टीको साथ खड्कालाई छ भने कांग्रेस आईको साथ निधिलाई रहेको बताइन्छ ।
भारतको समेत संस्थापन र प्रतिपक्षको रोजाइमा अलगअलग व्यक्ति परेपछि देउवालाई एकजना छान्न झन् मुस्किल भएको कांग्रेसनिकट स्रोतले बतायो । उपसभापतिको टुंगो नलागेका कारण सभापतिले नै मनोनीत गर्ने एक महामन्त्री र एक सहमहामन्त्रीको मनोनयन पनि हुन सकेको छैन ।