३ माघ २०७४, बुधबार ०५:१३ बुधवार साप्ताहिक, नयाँबानेश्वर, काठमाण्डौं

अध्यक्ष ओली स्वस्थ्य

काठमाडौं । नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीको स्वास्थ्य अवस्था राम्रो रहेको जनाइएको छ । ओलीको स्वास्थ्य अवस्था सोचेभन्दा राम्रो रहेको निजी सचिवालयले जनाएको छ ।
नियमित स्वास्थ्य परीक्षणका लागि थाइल्यान्डको राजधानी बैंकक पुगेका अध्यक्ष ओली अहिले बैंककमै छन् । बैंककमा नियमित स्वास्थ्य परीक्षण गरेपछि केही दिनका लागि उतै आराम गरेर बसिरहेका ओलीका निजी चिकित्सकहरू भने स्वदेश फर्किसकेका छन् । ओलीको बैंकको बुरुमगार्ड अस्पतालमा स्वास्थ्य परीक्षण गरिएको थियो ।
केही समयअघि पखालाका कारण स्वास्थ्यमा समस्या उत्पन्न भएपछि चिकित्सकहरूको सुझावअनुसार ओली स्वास्थ्य परीक्षणका निम्ति बैंकक गएका हुन् । ११ वर्षअघि मृगौला प्रत्यारोपण गरिएपछि ओलीको स्वास्थ्यमा बेलाबखत समस्या देखिँदै आएको थियो । र, नियमित स्वास्थ्य परीक्षण गर्न देशबाहिर जानुपर्ने अवस्था रहँदै आएको छ । अध्यक्ष ओली बैंककमै केही दिन आराम गरेर बिहीबार स्वदेश फर्किने जनाइएको छ ।