१ फाल्गुन २०७५, बुधबार ०३:३३ बुधवार साप्ताहिक, नयाँबानेश्वर, काठमाण्डौं

आज प्रधानमन्त्री रोजगार कार्यक्रम घोषणा

काठमाडौं । आज भव्य समारोहबीच सरकारले प्रधानमन्त्री रोजगार कार्यक्रम घोषणा गर्दै छ । मध्याह्न १२ः३० बजे प्रधानमन्त्री केपी शर्मा ओलीले योे कार्यक्रम घोषणा गर्ने कार्यक्रम छ । संविधानले परिकल्पना गरेको समाजवाद उन्मुख अर्थतन्त्र निर्माण गर्ने परिकल्पनालाई सरकार पार्न सरकारले सबै नागरिकलाई रोजगारीको न्यूनतम व्यवस्था गर्न पनि प्रधानमन्त्री रोजगार कार्यक्रम सुरु गर्न लागेको हो ।
यो कार्यक्रममा बेरोजगार भत्ता र निर्वाह भत्ता वितरण गर्ने व्यवस्था गरिएको छ । बेरोजगार व्यक्तिलाई एक आर्थिक वर्षमा न्यूनतम सय दिन बराबरको रोजगारी, रोजगार सूचना, परामर्श र सहजीकरण, व्यावसायिक तथा सीप विकास तालिम दिने व्यवस्था पनि सो कार्यक्रममार्फत गरिएको छ ।
न्यूनतम रोजगारीको अवसर पनि नपाएकाहरूलाई निर्वाह भत्ता उपलब्ध गराउने बताइएकोे छ । यो कार्यक्रम लागू गर्न देशका सबै स्थानीय तहमा रोजगार सेवा केन्द्र स्थापना गर्ने तयारी सरकारले गरेको छ । यसका लागि सरकारले आवश्यक जनशक्तिको माग गरिसकेको छ । चैत १ गतेदेखि ७ सय ५३ वटै स्थानीय तहमा रोजगार संयोजकले काम थाल्ने बताइएको छ । सुरुवातमा बेरोजगारको तथ्यांक संकलनलगायतका काम हुनेछ । संघ र प्रदेश सरकारहरूले पनि ऐन, नियमावली र निर्देशिकामा गरिएको व्यवस्थाबमोजिमका कार्यहरू गरी यो कार्यक्रम कार्यान्वयन गर्ने बताइएको छ ।