४ असार २०७६, बुधबार ०८:०९ बुधवार साप्ताहिक, नयाँबानेश्वर, काठमाण्डौं

देउवाको झेल ः प्रतिपक्ष रिझाउने खेल

काठमाडौं । चार वर्षसम्म पार्टी सञ्चालनमा लगभग असफल सावित भएपछि महाधिवेशन नजिकिँदै गर्दा कांगे्रस सभापति शेरबहादुर देउवाले थप बलियो बन्ने उद्देश्यले अनेक दाउपेच सुरु गरेका छन् ।
संघीय संरचनाअनुसार पार्टीभित्र प्रदेश कमिटी निर्माणदेखि, केन्द्रमा पदाधिकारी चयन, केन्द्रीय विभागहरू गठनजस्ता कुनै पनि महत्वपूर्ण काम देउवाले सम्पन्न गर्न सकेका छैनन् । वैचारिक राजनीतिक सवालमा शून्य र सांगठनिक व्यवस्थापनमा मृतप्राय बनेको कांग्रेस सीमित ‘सेलिब्रेटी नेता’को प्रचारका भरमा ‘मुभ’ हुँदै आएको टिप्पणी हुने गरेको छ ।
जम्बो छाया सरकार गठन गरेर पहिलो चरणको जागरण अभियान चलाएको कांग्रेसमा परिणाम उत्साहजनक नदेखिएपछि देउवाले प्रतिपक्षी कित्तामा रहेका रामचन्द्र पौडेल, शेखर कोइराला, कृष्णप्रसाद सिटौलालगायतका नेताहरूलाई झुक्याउन अर्को नयाँ कार्ड फ्याँकेका छन् । भदौ २४ गतेबाट दोस्रो जागरण अभियान चलाउने र त्यसअघि सबै केन्द्रीय विभागलगायत सबै सांगठनिक संरचनालाई पूर्णता दिने भन्दै देउवाले पार्टीभित्रका प्रतिपक्षको आलोचना कम गराउने रणनीति अख्तियार गरेका हुन् । अनुकूल स्थिति भयो भने आफू थप बलियो बन्नेगरी संरचनाहरूमा रिक्त स्थान पूर्ति गर्ने, अनुकूल नहुँदा पार्टीभित्रकै प्रतिपक्षलाई दोष दिएर बलियो बन्ने रणनीति देउवाले अख्तियार गरेका हुन् ।
आगामी फागुनभित्र देउवाको चार वर्षे कार्यकाल पूरा भइसक्ने भएकाले विधि र प्रक्रियाअनुसार त्यसभित्रै महाधिवेशन गर्नुपर्नेमा देउवा कम्तीमा अझै डेढ वर्ष कार्यकाल लम्ब्याउने खेलमा देखिएका छन् । गत महासमितिपछिको नयाँ विधानअनुसार कांग्रेसले प्रदेश कमिटी बनाउनुपर्ने हुन्छ । तर, त्यो कमिटी अधिवेशनबाट निर्वाचित गर्ने कि माथिबाटै मनोनीत गर्ने अझै टुंगो लागेको छैन । त्यस्तै, केन्द्रमा १५ जनासम्म पदाधिकारी बनाउनसक्ने व्यवस्था छ । यी दुई काम हुँदा केन्द्रीय विभागहरू पनि बन्नेछन् । यी सबै काम गर्दा पौडेल, कोइराला परिवार र सिटौलाको समेत चित्त बुझाउनुपर्ने भएकाले देउवाले आफ्नै समूहका नेताहरूलाई सन्तुष्ट बनाउनसक्ने स्थिति हुँदैन । त्यसैले प्रतिपक्षीहरूको असन्तुष्टिको आवाज मत्थर बनाउने र अन्तिममा यी कुनै पनि काम नगर्नकै लागि उनीहरूको आँखामा छारो हाल्न नयाँ–नयाँ रणनीति अघि सारेको बताइएको छ ।