१८ असार २०७६, बुधबार ०४:२२ बुधवार साप्ताहिक, नयाँबानेश्वर, काठमाण्डौं

पैसाको बलमा मोडलिङतिर

काठमाडौं । सशस्त्र प्रहरी बल हलचोकमा एक इन्स्पेक्टर निकै शक्तिशाली भएका छन् । उनको चर्चा त्यही कारण हलचोकभरि मात्र होइन, अन्यत्र पनि छ । उनी सशस्त्र प्रहरी बलभित्र पावरफुलबाहेक धनाढ्य अधिकारीको सूचीमा नाम दर्ज हुन सफल भएका छन् । उनको चर्तिकला देखेर सशस्त्र प्रहरीका उच्च हाकिम मात्र होइन, सिंहदरबारस्थित तालुकदार मन्त्रालय गृहमा समेत उनको धन्दाबारे चर्चा हुन्छ । ती व्यक्ति हुन्, सशस्त्र प्रहरी इन्स्पेक्टर गणेश मल्ल ।
उनले सशस्त्र प्रहरी बलका उच्च तहका आशीर्वाद पाएर नै अहिले केन्द्रीय लेखाका प्रमुख हर्ताकर्ता भएका हुन् । सशस्त्र प्रहरीको लेखापाल सरुवादेखि आन्तरिक बजेट वितरणमा इन्स्पेक्टर मल्लकै हालीमुहाली चल्ने गरेको छ । उनले कुनै लेखापालले गृह या अन्य शक्ति केन्द्रबाट पावर लगाएर आउनेको पनि विभिन्न बहाना बनाएर पैसा नखाई काम नगर्ने गरेको बताइन्छ ।
त्यसो त सशस्त्र प्रहरी बलको बलम्बुस्थित हस्पिटलमा जग्गा किन्दादेखि निर्माण कार्य सम्म इन्स्पेक्टर मल्लकै अगुवाइमा काम भएपछि उनले हस्पिटलपछाडि एउटा जग्गासहित एक घर जोड्न भ्याएका थिए । मानवस्रोत हुँदै हस्पिटलसम्मको यात्राका क्रममा जोडेको घर उनले धैरै अघि नै १ करोड २० लाख रुपैयाँमा बिक्री गरेको खुलासा भएको छ ।
उनको नयाँ सम्पतीका बारेमा सम्पत्ति शुद्धीकरण अनुसन्धान विभागले निष्पक्ष छानबिन ग¥यो भने सबै कुरा पत्ता लाग्ने बुझिएको छ । हाल केन्द्रीय लेखामा रहेको उनले बढीजसो सुदूरपश्चिम क्षेत्रका एकाउन्टेनलाई बजेट पठाएर समेत कमिसन खाने गरेको खुलासा भएको छ । एकाउन्टेन्ट मल्लले आफ्नो श्रीमती शिलाष्मा मल्ललाई पनि पैसाको बलमा मोडल बनाएका छन् । श्रीमती शिलाष्मा मल्ल हमाललाई पनि राजेश हमालसँग अढाइ लाख खर्र्च गरेर भिडियो गर्न लगाएका छन् । ‘व्यर्थै रहेछ’ नामको भिडियो सुटिङ पनि पैसाको बलमा गरेको बताइएको छ । यता उनको छोरालाई पनि थाइल्यान्ड इन्टरनेसनल फेसन फेस्टमा सहभागिता गराएका छन् । सशस्त्रको मुख्य ढुकुटी चलाउने उनले आफूले कमाएको अकूत सम्पत्ति र पैसाको बलमा नाम कमाउन परिवारलाई जति पनि पैसा खर्च गरिदिने गरेको पारिवारिक सूत्रले बतायो ।