१ श्रावण २०७६, बुधबार ०४:१२ बुधवार साप्ताहिक, नयाँबानेश्वर, काठमाण्डौं

साउन पहिलो साता सरकारको नयाँ कार्ययोजना

काठमाडौं । सरकारले साउन पहिलो साताबाट आर्थिक वर्ष २०७६÷७७ को नयाँ कार्ययोजनासहित काम सुरु गर्ने भएको छ । अघिल्लो वर्षलाई कानुन र संरचना निर्माण गर्ने समृद्धिको आधार वर्ष तथा आजबाट सुरु भएको नयाँ आर्थिक वर्षबाट समृद्धिको यात्राका लागि सरकारले गेयर बदल्ने प्रधानमन्त्री केपी ओलीले घोषणा गर्दै आएका छन् । त्यसअनुसार नै ओलीले २४ वटै मन्त्रालयलाई प्राथमिकताका पुराना योजनालाई तीव्रता दिएर समयभित्रै सम्पन्न गर्ने र थप नयाँ योजनाहरू अघि बढाउने तयारीसहित कार्ययोजना पेस गर्न निर्देशन दिएको बताइएको छ ।
गत २६ र २७ असारमा अघिल्लो आर्थिक वर्षको समीक्षा सकिएकाले एक हप्ताभित्र नयाँ कार्ययोजनामा छलफल गरी पारित गर्ने सरकारको तयारी छ । ती कार्ययोजनालाई प्रधानमन्त्रीले सीधै एप्समार्फत नियमित रूपमा अनुगमन र मूल्यांंकन गर्दै आएका छन् । राष्ट्रिय गौरवका आयोजनालाई सीधै प्रधानमन्त्री कार्यालयबाट भिडियो कन्फरेन्समार्फत निर्देशन दिन सकिनेगरी एक्सन रुम पनि सञ्चालनमा आइसकेको छ । प्रधानमन्त्री कार्यालयका प्रवक्ता सहसचिव विनोदबहादुर कुँवरले २४ वटै मन्त्रालयले साउन पहिलो साताभित्र नयाँ कार्ययोजना पेस गर्नेगरी काम गरिरहेको बताए ।