१ श्रावण २०७६, बुधबार ०४:१४ बुधवार साप्ताहिक, नयाँबानेश्वर, काठमाण्डौं

भ्रष्टाचारको अखडा बन्दै महानगर

काठमाडौं । ३० असार २०७६ मा काठमाडौं महानगरपालिका, सामाजिक विकास विभागका नायव सुब्बा (पाँचौं तह) का कृष्णप्रसाद सोती कार्यालय परिसर परिसर बबरमहलबाट अख्तियार दुरुपयोग अनुसन्धानको फन्दामा परे । १ लाख ७ हजार रुपैयाँ घुस रकमसहित पक्राउ परेका परेका उनी कांग्रेसनिकट महानगर कर्मचारी एकाइ अध्यक्षसमेत हुन् ।
अख्तियारको टोलीले घुससहित नियन्त्रणमा लिएपछि सोती टोलीसँग जंगिए । उनले भने, ‘लेखा अधिकृतहरूलाई चाहिँ के हुन्छ ? हाकिमहरूलाई चै के हुन्छ ?’ लेखा अधिकृत र हाकिमहरूको आदेशअनुसार आफूले काम गरेको उनको दाबी थियो । उनले जंगिँदै भनेको लेखा अधिकृत हुन्, श्याम न्यौपाने । स्रोतका अनुसार १ लाख ७ हजार घुसका हकदार उनी पनि थिए । न्यौपानेले भुक्तानीबापतको चेक घुस पाएपछि मात्रै काट्ने गरेको भन्दै सोतीले न्यौपानेलाई समेत अख्तियारमा पोलेका छन् ।
स्रोतका अनुसार काठमाडौं महानगरपालिकाका हरेकजसो कामहरूमा कर्मचारीहरूले ‘हलो अड्काएर’ राख्ने गरेका छन् । सरकारले विभिन्न संघ, संस्था र प्रतिष्ठानहरूलाई दिने अनुदान रकम पनि महानगरमार्फत नै भुक्तानी हुने गरेको छ । हरेकजसो कार्यक्रम र काममा कम्तीमा ५ प्रतिशत रकम कर्मचारीहरूले माग्ने गरेका छन् । ५ प्रतिशत रकमको ग्यारेन्टी नभएसम्म काम नै नहुने सेवाग्राहीहरूको भनाइ छ । एक सेवाग्राहीले भने, ‘अन्तिममा लेखा अधिकृतले यसको कुरो मिलाउनुभयो त ? भनेर सोध्छन् । हजुर मिलाएँ भनेपछि मात्रै चेक काट्छन् । त्यो कुरा भनेको चाहिँ घुस रहेछ ।’