१ श्रावण २०७६, बुधबार ०४:३४ बुधवार साप्ताहिक, नयाँबानेश्वर, काठमाण्डौं

प्रदेश विकास बैंकका लागि कार्यदल गठन

जनकपुरधाम । प्रदेश २ सरकारले आफ्नै स्वामित्वमा प्रदेश विकास बैंक स्थापना गर्न लागेको छ । प्रदेश २ का आर्थिक मामिला तथा योजनामन्त्री विजयकुमार यादवले प्रदेशको समग्र विकासका लागि सरकारकै स्वामित्वमा बैंक स्थापना अपरिहार्य रहेकाले बैंक स्थापनाको गृहकार्य अघि बढाइएको जनाएका छन् । बैंक स्थापनाका लागि गृहकार्य गर्न प्रदेश नीति आयोगका उपाध्यक्ष डा. हरिवंश झाको संयोजकत्वमा सात सदस्यीय कार्यदल गठन गरिएको छ ।
कार्यदलमा आर्थिक मामिला तथा योजना मन्त्रालयका सचिव प्रेमकुमार श्रेष्ठ, आर्थिक मामिला तथा योजनामन्त्रीका आर्थिक सल्लाहकार राजकुमार सिंह, जनकपुरस्थित संघीय कोलेनिकाका प्रमुख डा. वीरेन्द्र मिश्र, राष्ट्र बैंक जनकपुरका प्रतिनिधि, आन्तरिक मामिला तथा कानुन मन्त्रालयका कानुन अधिकृत र आर्थिक मामिला तथा योजना मन्त्रालयका अधिकृत सञ्जय सरदार सदस्य सचिव रहेका छन् । कार्यदलले बैंक स्थापनाको आवश्यकता र औचित्य तथा अवधारणापत्र तयार गरेर प्रदेश सरकारलाई बुझाउने जिम्मेवारी पाएको छ । कार्यदलका संयोजक डा. झाले अवधारणापत्रमाथिको छलफल सुरु भइसकेको र सम्भवतः यसै साता अन्तिम रूप पाउने बताएका छन् ।