१९ मंसिर २०७६, बिहीबार ०६:२३ बुधवार साप्ताहिक, नयाँबानेश्वर, काठमाण्डौं

वैरोको सेटिङ दूतावाससम्म

काठमाडौं । वैदेशिक रोजगार विभागमा हुने गरेको अनियमितता झनै बढ्न थालेको छ । पछिल्ला दिनमा कसैको प्रमाणीकरण एकै दिन हुने र कसैको हप्तौं लाग्ने हुन थालेपछि सेवाग्राहीहरू हैरानमा परेका छन् । ती कागजपत्र प्रमाणीकरणमा घुसको व्यापक चलखेल हुन थालेपछि यस्तो अवस्था आएको हो ।
एक व्यवसायीले दुई साताअगाडि मलेसियास्थित नेपाली दूतावासमा मागपत्र प्रमाणीकरणका लागि आवेदन गरे । तर, त्यो आवेदन दूतावासले अझैसम्म प्रमाणीकरण गरेको छैन । तर, आश्चर्य त्यही दूतावासमा अर्का एक व्यवसायीले पेस गरेको मागपत्र चार घन्टा बित्दानबित्दै प्रमाणीकरण भएर बाहिरियो । दूतावासले आफूसमक्ष आउने मागपत्र प्रमाणीकरणका लागि १० दिनको समय तोकेको छ । यसअघि उसले यो अवधि पाँच दिन तोकेको थियो । जुन अवधि तोकिए पनि कुनै व्यवसायीको तुरुन्तै र कुनै व्यवसायीको हप्तौं लाग्ने गरेको गुनासो स्वयं व्यवसायीहरूले नै गरेका छन् । यसको मुख्य कारण सेटिङ भएको र घुसको चलखेलमा नै सबै काम भइरहेको व्यवसायीहरूको गुनासो छ । वैदेशिक रोजगार विभागका कर्मचारीहरूले मलेसियास्थित दूतावाससम्म पनि सेटिङ गर्ने र नेपालमा पैसा बुझेर मलेसियास्थित दूतावासका कर्मचारीलाई इमेल लेखेर कागजात प्रमाणित गर्न लाउने गरेको खुलेको छ । यो गुनासोलाई नेपाल वैदेशिक रोजगार व्यवसायी संघले पनि पुष्टि गरेको छ । संघको आइतबार बसेको बैठकमा यसबारे छलफल भएको एक पदाधिकारीले बताए ।
मलेसियाको रोजगारी सुचारु भए पनि नेपाली दूतावासबाट व्यवसायी छानेर मागपत्र प्रमाणीकरण गर्ने काम भएको भन्दै पहुँचवाला र पैसा खर्च गर्ने व्यावसायिकको एकै दिन काम हुने तर अन्य व्यवसायीको हप्तौं लाग्ने गरेको बताइन्छ । एकै दिनमा मागपत्र प्रमाणित भए पनि पहुँच नहुने कतिपय व्यवसायीले पेस गरेको डिमान्ड प्रमाणीकरण गर्न तीन हप्ताभन्दा लामो समय लागिरहेको बताइन्छ ।