२१ श्रावण २०७९, शनिबार ०७:०० बुधवार साप्ताहिक, नयाँबानेश्वर, काठमाण्डौं

मंसिर ४ पछि नयाँ जनादेशसहित सिंहदरबार फर्कन्छौं : नेम्बाङ

२१ साउन, दाङ । प्रमुख प्रतिपक्षी दल नेकपा (एमाले) का उपाध्यक्ष तथा पूर्व सभामुख सुवास नेम्बाङले आगामी चुनावबाट पाँच दलीय गठबन्धनलाई ठेगान लगाउने बताएका छन् ।

प्रेस चौतारी दाङले शनिबार आयोजना गरेको पत्रकार सम्मेलनमा उनले वर्तमान गठबन्धन सरकार केका लागि भनेर जनताले बुझिसकेकाले मंसिर ४ गते जनताले दूधको दूध, पानीको पानी छुट्याउने दाबी गरे ।

नेम्बाङले आगामी चुनावपछि एमालेले सरकारको नेतृत्व गर्ने ठोकुवा गरे । ‘एमालेविरुद्ध गठबन्धन गरे पनि मंसिर ४ पछि नयाँ जनादेश लिएर सिंहदरबार फर्कन्छौं’, उनले भने ।

उनले सरकारले दीर्घकालीन असर पर्ने निणर्य गर्न नहुने जिकिर गर्दै निर्वाचन मिति भएसँगै सरकार काम चलाउन भइसकेको बताए । उनले चोलेन्द्रशमशेर राणाविरूद्धको महाभियोग अहिलेसम्म नटुंग्गाउनु सरकार र सभामुखको कमजोरी भएको दाबी गरे ।