२५ श्रावण २०८०, बिहीबार १४:०४ बुधवार साप्ताहिक, नयाँबानेश्वर, काठमाण्डौं

कांग्रेस सांसद शर्मा पक्राउबारे सिआइवीले पठायो सभामुखलाई पत्र

२५ साउन, काठमाडौँ । नेपाल प्रहरीको केन्द्रीय अनुसन्धान ब्युरो (सिआइवी) ले कांग्रेस सांसद सुनिल शर्मा पक्राउ परेको जानकारी सभामुख देवराज घिमिरेलाई गराएको छ ।

संविधानको धारा १०३ (६) अनुसार कुनै सांसदलाई पक्राउ गरे लगत्तै त्यसको सूचना सम्बन्धित सदनको प्रमुखलाई दिनुपर्ने व्यवस्थाअनुसार सिआइवीका प्रमुख किरण बज्राचार्यले शर्मालाई अनुसन्धानका लागि नियन्त्रणमा लिएको जानकारी दिएका हुन् । शर्मालाई शैक्षिक प्रमाणपत्र कीर्ते अभियोगमा अनुसन्धानका लागि नियन्त्रणमा लिएको बज्राचार्यले सभामुख घिमिरेलाई प्रेषित पत्रमा उल्लेख छ ।

सिआइवीले पत्रमा भनेको छ, ‘निज सुनिलकुमार शर्मा जिल्ला मोरङ, क्षेत्र नं ३ का नेपाली कांग्रेसका तर्फबाट २०७९ सालको प्रत्यक्षतर्फ प्रतिनिधि सभामा निर्वाचित सांसद रहेकाले नेपालको संविधान २०७२ को धारा १०३ को उपधारा ६ बमोजिम प्रतिनिधि सभाको सदस्य निज सुनिलकुमार शर्मा पक्राउ परेको यसै पत्रद्वारा सम्माननीय सभामुख समक्ष सूचना एवं जानकारी गराइएको व्यहोरा सादर अनुरोध गरिएको छ ।’