२७ बैशाख २०७५, बिहीबार ०७:३५ बुधवार साप्ताहिक, नयाँबानेश्वर, काठमाण्डौं

अखिलमा केटाकेटी शैली

काठमाडौं । अनेरास्ववियुमा केही पदाधिकारीले केटाकेटी शैली प्रस्तुत गरेपछि भद्रगोल भएको छ । महासचिव ऐन महरले संगठन सञ्चालनसम्बन्धी पूर्ण अधिकार प्राप्त गरेका कार्यवाहक अध्यक्ष महेश बर्तौलासँग कुनै परामर्श नगरी फेसबुकबाट बैठक आह्वान गरेपछि केटाकेटी शैली प्रस्तुत भएको हो । अध्यक्षसँगको परामर्शमा मात्र बैठक बोलाउने व्यवस्था भए पनि महासचिव महरले कसैलाई नसोधी फेसबुकबाटै बैठक आह्वान गरेका थिए ।
सो कुराको सर्वत्र आलोचना भएपछि हिजो बसेको अनेरास्ववियुको स्थायी समिति बैठकमा महासचिव महरले माफी मागेका थिए । तर, कार्यवाहक अध्यक्ष बर्तौलाले भने संगठनमा कुनै विवाद नभएको दाबी गरे । आगामी जेठ ४ र ५ गते अनेरास्ववियुको केन्द्रीय कमिटी बैठक आह्वान भएको र सो बैठकमा संगठनको आन्तरिक जीवनबारे छलफल हुने बताइएको छ ।
सो केन्द्रीय कमिटी बैठकले संगठनलाई नयाँ नेतृत्व दिनेसमेत अपेक्षा गरिएको छ । सर्वसम्मत रूपमा नयाँ नेतृत्व चयन नभए निर्वाचनबाट भने पनि नयाँ नेतृत्व चयन गर्न अधिकांश केन्द्रीय सदस्यहरूले माग गरेका छन् ।