११ असार २०७६, बुधबार ०६:३७ बुधवार साप्ताहिक, नयाँबानेश्वर, काठमाण्डौं

रसियाली टोलीद्वारा नेपाली सांसदसँग भेटवार्ता

काठमाडौं । रुसी महासंघको माथिल्लो संसद्को एक प्रतिनिधिमण्डलले राष्ट्रिय सभा प्रत्यायोजित व्यवस्थापन तथा सरकारी आश्वासन समितिका सभापति रामनारायण बिडारीसँग भेटवार्ता गरेको छ ।
नेपाल भ्रमणमा आएको रुसी संसदको टोलीले सभापति बिडारीसहित समितिको टोलीसँग सिंहदरबार स्थित संसद भवनको कार्यकक्षमै भेटवार्ता गरेको हो । रुसी संसदस्थित प्रत्यायोजित व्यवस्थापन हेर्ने समितिका सभापति ऐन्द्रेइ क्लिसास नेतृत्वको टोलीमा उपसभापति अलेक्जेन्डर वासाकिन, सदस्य ओलेग टोस्पोकिन र समिति सचिव पिटर कुचेरेन्को लगायत थिए ।
भेटवार्तामा नेपाली टोलीका तर्फबाट सभापति बिडारीका साथै सदस्यहरू राधेश्याम अधिकारी, बलराम बास्कोटा, हरिराम चौधरीलगायत थिए । भेटवार्तामा दुइदेशका नीति, नियम तथा ंसंवैधानिक प्रणालीबारे चर्चा गर्दै संसदीय सहयोग आदानप्रदान एवं भाइचारा सम्बन्ध विस्तारबारे छलफल भएको सभापति बिडारीले जानकारी दिए ।
भेटमा दुई देशीय सम्बन्ध अझ सुदृढ गरी संसदीय तहमा प्रगाढ बनाउनेबारे समेत छलफल भएको बताइएको छ । यसैबीच, उनीहरूको सम्मानमा सो समितिले बिहीबार नै रात्रिभोज समेत दिएको थियो ।