२५ पुष २०७८, आईतवार १०:३६ बुधवार साप्ताहिक, नयाँबानेश्वर, काठमाण्डौं

मेरो सरकार असफल बनाउन कांग्रेसले कर्मचारीलाई उर्दी जारी गरेको थियो : ओली

२५ पुस,झापा । प्रमुख प्रतिपक्षी दल नेकपा (एमाले) का अध्यक्ष केपी शर्मा ओलीले आफू नेतृत्वको सरकारलाई असफल बनाउन नेपाली कांग्रेसले कर्मचारीलाई उर्दी जारी गरेको आरोप लगाएका छन् ।

नेपाल निजामती कर्मचारी संगठन झापाको नवनिर्मित भवनको आइतबार उद्घाटन गर्दै एमाले अध्यक्ष ओलीले कांग्रेसले कर्मचारीलाई त्यस्तो उर्दी जारी गरेको बताएका हुन् । उनले कांग्रेसले लोकतान्त्रिक मूल्य मान्यताविरुद्ध लाग्न कर्मचारीलाई निर्देशन दिएको दाबी गरे । अहिलेको सरकारले कर्मचारीतन्त्रलाई आफू अनुकूल काम गराउन बाध्य पारेको उनको आरोप थियो ।

तानाशाहीविरुद्ध असहयोग केही समय चल्न सक्छ, उनले भने, तर लामो समयसम्म कर्मचारीलाई असहयोग गर्नु भन्न मिल्दैन । सरकारले कर्मचारीतन्त्रलाई सत्ता अनुकूल प्रयोग गरेको समेत अध्यक्ष ओलीले आरोप लगाएका छन् । ओलीले गैरआवासीय नेपाली संघ (एनआरएनए) को सम्मेलन रोकेर शेरबहादुर देउवा नेतृत्वको सरकार लोकतान्त्रिक मूल्य मान्यताविरुद्ध गएको पनि आरोप लगाएका छन् ।