२४ बैशाख २०७१, बुधबार ०७:१० बुधवार साप्ताहिक, नयाँबानेश्वर, काठमाण्डौं

टक्लाको वास्तविक अनुहार

एउटा उखानै छ, निमको फेदमा जतिसुकै चिनी खन्याए पनि त्यसको पात गुलियो हुँदैन । जो जस्ता चरित्रका छन्, त्यसले त्यही चरित्र, स्वभाव र व्यवहार प्रदर्शन गर्ने हुन् । आपराधिक पृष्ठभूमिबाट राजनीतिमा छिरेका जनकपुर बम काण्डका खलनायक सञ्जयकुमार साह ‘टक्ला’ले आफ्नो पूर्ववर्ती स्वभाव किन त्याग्थे र ? अहिले उनी त्यही आपराधिक स्वभाव र व्यवहारको चंगुलमा फसेका छन् ।
केही वर्षपहिले जनकपुरमा भएको बम काण्डले निकै सनसनी मच्चाएको थियो । धेरै नै निन्दनीय उक्त बम काण्डमा पाँच जना व्यक्तिले ज्यान गुमाउन पुगेका थिए । त्यही बम काण्डको मुख्य योजनाकारका रूपमा निलम्बित सभासद् सञ्जय उर्फ टक्ला रहेको खुलासा भएको छ र अहिले उनी प्रहरीको कब्जामा परिसकेका छन् ।
राजनीतिमा छिर्नुअघि टक्लाको मुख्य काम नै असुली गर्ने थियो । व्यवसायी र व्यापारीहरूलाई धम्क्याएर रकम असुल्ने कार्यमा सिद्धहस्तता प्राप्त उनी जनकपुर क्षेत्रका डनका रूपमा परिचित थिए । पछि उनले ठेक्कापट्टामा पनि हात हाले र धम्कीकै भरमा ठेक्कापट्टा हात पार्न थाले । तर, तराई आन्दोलनको उपजस्वरूप उनी मधेसको राजनीतिमा प्रवेश गरे र ०६४ को चुनावमा सभासद् जिती भौतिक योजना तथा निर्माण राज्यमन्त्रीसमेत हुन पुगे ।
तर, आपराधिक गतिविधि गर्दै राजनीतिमा छिरेकाले आफ्नो आपराधिक क्रियाकलाप किन त्याग्थे र ? अहिले टक्ला आफ्नै आपराधिक क्रियाकलापको सिकार हुन पुगेका छन् । जसको जग नै कच्चा माटोले बनेको छ भने घर कसरी पक्का हुन सक्छ र ? होइन त ?