२४ बैशाख २०७१, बुधबार ०८:१८ बुधवार साप्ताहिक, नयाँबानेश्वर, काठमाण्डौं

वागमती सफाइमा व्यवसायी

काठमाडौं । अरु बेला ठूल्ठूला चट्टानी पहाड फुटाउने, सडक सम्याउने काममा दत्तचित्तपूर्वक खट्ने अनुहारहरू केही दिनअघि भने बेग्लै अभियानमा थिए । उनीहरू प्रदुषणको चपेटामा परेको वागमती नदीलाई कसरी पवित्र र स्वच्छ राख्ने भन्ने चिन्तनमा थिए । र, बिहान सबेरै तिलगंगाको किनार वरिपरि भेला भएर वागमतीलाई सफा बनाउन तल्लिन रहे ।

उनीहरू अरु कोही थिएनन्, नेपाल हेभी इक्विपमेन्ट संघका पदाधिकारीहरू थिए । संघका अध्यक्ष ताराबहादुर कुँवरको नेतृत्वमा वागमती सफाइ गर्न हेभी इक्विपमेन्ट व्यवसायीहरू गएको शनिबार तिलगंगामा जुटेका थिए । हेभी इक्विपमेन्ट व्यवसायीहरूसँगै वागमती सफाइमा मुख्य सचिव लीलामणि पौडेल पनि सहभागी थिए । करिब ५१ जना व्यवसायीहरू बिहानैदेखि बागमती सफा गर्न जुटेका थिए । उक्त अभियानमा काठमाडौं, ललितपुर, भक्तपुरलगायत जिल्लाका हेभी इक्विपमेन्ट व्यवसायीहरू उपस्थित रहेको महासचिव प्रेमलाल श्रेष्ठले जनाए ।

यसअघि पनि हेभी इक्विपमेन्ट व्यवसायीहरूले वागमती सफाइका लागि आफ्ना उपकरणहरू उपलब्ध गराउने बताउँदै आएको थियो । ‘आवश्यक पर्‍यो भने हामी आफ्ना उपकरणहरू वागमती नदी सफा गर्न उपलब्ध गराउन तयार छौं ।’ महासचिव श्रेष्ठले बताए ।