१८ भाद्र २०७१, बुधबार ०७:०३ बुधवार साप्ताहिक, नयाँबानेश्वर, काठमाण्डौं

यसपटक सभामखुलाई के भयो ?

यसपटक संविधानसभाका अध्यक्ष सुवास नेम्वाङ अलि फरक देखिनुभएको छ । प्राय: बैठकमा ‘मान्य सदस्य फलाना….’ भन्दै नाम भट्याउने नेम्वाङले यसपटक चाहिँ केही गर्नुहोला जस्तो देखिएको छ । दलहरूलाई जतिसुकै अनुरोध गर्दा पनि नमानेपछि उहाँले संसदीय समितिका सभापतिहरूको निर्वाचनका लागि दिनै तोकिदिनुभयो र निर्वाचन भयो । अनि अहिले कार्यतालिका परिवर्तन गर्नका लागि कुरा चल्दै गर्दा ‘त्यो चाहिँ हुँदैन है, यसपटक म मान्दिनँ’ भनिरहनुभएको छ । उहाँलाई विगत आठ वर्षदेखि सभामुखका रूपमा देखिरहेका र भोगिरहेकाहरूले भन्न थालेका छन्– ‘होइन, यसपटक पानी पर्छ कि क्या हो ?’
शालिन, सभ्य र शिष्ट सुवास नेम्वाङ कसैलाई चिढ्याउन चाहनुहुन्न । भलै त्यही कारणले आफ्नो पहिचान नै खतरामा नपरोस् । त्यही भएर संसद्मा अर्थमन्त्रीको बजेट वक्तव्य राखेको ब्रिफकेस लुटिँदा र फोडिँदा पनि उहाँले कसैलाई केही गर्नुभएन । तर, साना दलका सभासद्ले अति गरे भने चाहिँ उहाँलाई रिस नउठ्ने होइन । सञ्जय शाहले माइक भाँचेपछि ९४ हजार रुपियाँ के तिराउन खोज्नुभएको थियो, सर्वोच्च अदालतले माइक भाँचेको ठीक छ, भाँच्न पाउनुपर्छ भन्दै उहाँको आदेश खारेज गरिदियो । अस्ति एक दिन कमल थापालाई पनि उहाँले तह लगाइदिनुभयो । पहिला बाझाबाझ गर्ने कमल थाहाले एकैछिनमा नतमस्तक भएर माफी माग्ने बनाइदिनुभयो । यसबाट के देखिन्छ भने उहाँमा रिसै नभएको चाहिँ होइन । भलै कमल थापालाई झैं पुष्पकमल दाहालले बोल्दा रोक्न नसक्नु बेग्लै कुरा हो ।
कार्यतालिका फेरि बदलियो भने माघ ८ मा संविधान बन्दैन । सभामुखले यस्तो कुरा पक्कै पनि बुझ्नुभएको छ । सुरुदेखि नै समय सार्दै गयो भने कसरी दुर्घटनामा परिन्छ भन्ने उहाँलाई थाहा छ । यही कारणले गर्दा यसपटक समय सारिँदैन, सकिन्छ निर्धारित समयमा सहमति कायम गर्नुहोस्, सकिँदैन प्रक्रियामा ल्याउनूस् भनेर उहाँले समितिका सभापतिहरूलाई निर्देशन दिनुभएको छ । हेरौं, त्यो निर्देशन पालना गराउन उहाँ कत्तिको सफल हुनुहुन्छ †