२ आश्विन २०७१, बिहीबार ०९:०४ बुधवार साप्ताहिक, नयाँबानेश्वर, काठमाण्डौं

गुणस्तर वृद्धि पहिलो प्राथमिकता

नेपाल टेलिकमले सदैव झेल्दै आइरहेको एउटै गुनासो हो– सेवा विस्तारमा छलाङ मारे पनि गुणस्तरीयता भने प्रदान गर्न सकेन । हुन पनि, आगामी एक वर्षभित्र टेलिकमले ग्राहक संख्या मात्रै २२ लाख पुर्‍याउने लक्ष्य लिएको छ । र, ग्राहक बढाउनका लागि जीएसएम सेवालाई नै उपयुक्त ठानिएको छ । किनकि, यो नै विश्वमा रहेको अन्य सेवाभन्दा लोकप्रिय र सबैद्वारा रुचाइएको सेवा हो ।
केही दिनअघि मात्रै नेपाल टेलिकमको प्रबन्ध निर्देशकमा नियुक्त भएका बुद्धिप्रसाद आचार्य टेलिकमलाई नयाँ गति दिन उत्साहित छन् । टेलिकम राष्ट्रको कम्पनी भएको हुँदा देशको कुनाकाप्चासम्मै आफ्नो सेवा विस्तार गरिरहेको अवस्थामा अब टेलिकमलाई अग्रगति दिन उनले के सोचिरहेका छन् त ? भन्छन्– ‘हामीप्रति ग्राहकहरूको निकै ठूलो भरोसा रहँदै आएको छ । त्यो भरोसालाई कायम राख्दै आगामी दिनमा थप सेवाहरू विस्तार गर्ने, नयाँ–नयाँ प्रविधिहरू भित्र्याउने र विभिन्न किसिमका सुविधाहरू उपलब्ध गराउने, सस्तो मूल्यमा सेवा उपलब्ध गराउने र गुणस्तरीय सेवा उपलब्ध गराउने दिशामा हामी केन्द्रित हुनेछौं ।’
खासगरी, जीएसएम मोबाइल सेवा, सीडीएमए, निश्चित टेलिफोन लाइन सेवा, एडीएसएल सेवा र इन्टरनेट सेवा नै टेलिकमको व्यापारको मुख्य सेवा क्षेत्र हुन् । ‘यी सेवाहरूको विस्तार र गुणस्तरीयतालाई नै हामीले पहिलो प्राथमिकतामा राखेका छौं’– प्रबन्ध निर्देशक आचार्य भन्छन् । यी सेवाबाहेक सहायक योजनाहरू पनि अहिले टेलिकमले अगाडि बढाइरहेको उनी बताउँछन् । ती योजनाहरूले मुख्य सेवालाई नै सहयोग पुर्‍याउने काम गर्दछन् । उनी भन्छन्– ‘हामीले आम्दानी वृद्धि हुनेबारे पनि योजनाहरू ल्याइरहेका छौं । आम्दानी वृद्धि भएपछि नाफा बढ्छ ।’
टेलिकमले सेवा विस्तारका सन्दर्भमा तीन योजना अघि सारेको छ । एउटा, अहिले जुन–जुन ठाउँमा सेवा पुर्‍याउन सकिरहेको छैन, ती ठाउँहरूमा सेवा पुर्‍याउन लागिपरेको छ । त्यस्तै, सेवा पुगेका ठाउँहरूमा पनि क्षेत्र विस्तार गर्ने योजना रहेको छ । र, सेवा उपलब्ध भइरहेका ठाउँहरूमा गुणस्तरीयता वृद्धि गर्ने योजना रहेको छ । तथापि, गुणस्तरीयता वृद्धि गर्ने सवालमा टेलिकमले कस्तो योजना बनाइरहेको छ ? आचार्य भन्छन्–‘हामीले अहिले सेवा विस्तारको जुन काम गरिरहेका छौं, यो काम गुणस्तरसित पनि सम्बन्धित छ । तसर्थ, सेवा विस्तारलाई हामीले गुणस्तरसित पनि जोडेर लगिरहेका छौं । र, विगतमा गुणस्तरमा जुन समस्या आएको थियो, आगामी दिनमा त्यस्तो समस्या आउँदैन । अब गुणस्तरमा ग्राहकले अनुभव गर्न सकिने सेवा प्रदान गरिनेछ । किनकि, गुणस्तर भनेको एक दिनमा गरेर हुने काम होइन । गुणस्तर कायम राख्न हामीले निरन्तर प्रयास गरिरहनुपर्छ ।’ आगामी दिनमा ग्राहकहरूले गुणस्तरलाई लिएर थप प्रश्न उठाउन नपाउने गरी काम गरिरहेको पनि उनले बताए ।
वि.सं.२०२७ सालमा पोखराको काहुँमा जन्मिएका आचार्यले स्कुलको अध्ययन भने बर्दियाको मैनापोखरबाट पूरा गरे । ०३२ सालमा उनको परिवार बसाइँ सरेर मैनापोखर गएपछि उनले त्यहीको शारदा माध्यमिक विद्यालयबाट ०४४ सालमा एसएलसी उत्तीर्ण गरे । नेपालगञ्जको महेन्द्र बहुमुखी क्याम्पसबाट आईकम र शंकरदेव क्याम्पसबाट बीकम उत्तीर्ण गरेका उनले भारतको नयाँ दिल्लीस्थित द इन्टिच्युट अफ चार्टर्ड एकाउन्टेन्ट अफ इन्डियाबाट सन् १९९८ मा सीए उत्तीर्ण गरे । सीए पूरा गरेर नेपाल फर्किएपछि विभिन्न कन्सलटेन्सीहरूमा कार्यरत रहेकै बेला उनी ०५५ सालमा नेपाल टेलिकममा दसौं तहको कर्मचारीको रूपमा सेवा प्रवेश गरे । ०६५ सालमा एघारौं तहमा बढुवा भएका उनी केही दिनअघि मात्रै प्रबन्ध निर्देशकमा नियुक्त भएका हुन् । आफू टेलिकमको प्रबन्ध निर्देशक भएर आएपछि उनले गुणस्तरीयतालाई उत्तिकै महत्त्व दिएर काम सुरु गरेका छन् । भन्छन्– ‘गुणस्तर वृद्धि गर्नु भनेको अहिलेको उच्च प्रविधिलाई पछ्याउनु हो र अर्को कुराचाहिँ मर्मत, सम्भारलाई ध्यान दिनु हो । यी दुई कुराको संयोजनले गुणस्तर राम्रो हुन्छ । यी दुईटा कुरामा हामीले तालमेल मिलाउन सक्यौं भने गुणस्तरमा समस्या आउँदैन ।’
नेपालका टेलिफोन कम्पनीहरूले विगतदेखि नै आफ्ना ग्राहक बढाउन तीव्र प्रतिस्पर्धा गरे पनि अन्य पाटोमा भने त्यति ध्यान दिने गरेको पाइँदैन । अहिले पनि यही स्थिति कायम छ । टेलिकमले चाहिँ के सोचिरहेको छ त, यो विषयमा ? आचार्य भन्छन्– ‘विगतमा सेवाको माग एकदम धेरै थियो । र, हामीसित क्षमता कम थियो । क्षमता कम र माग बढी हुँदा हामीले आफ्नो क्षमताभन्दा बढी नै ग्राहक बनाएर सेवा विस्तार गरेकाले यस्तो समस्या आएको हो । तर, आजको दिन भने त्यस्तो छैन । बजारको माग र आफूले आपूर्ति गर्ने क्षमता उस्तै–उस्तै छ । तसर्थ, अहिले हामीले मागभन्दा पनि आपूर्ति गर्ने क्षमतालाई बढाएर लगेका छौं ।’ आफूहरूले आपूर्ति गर्ने क्षमतालाई बढाएर लगिएको हुँदा गुणस्तरीयता पनि ध्यान दिएको आचार्य बताउँछन् ।
जीएसएम मोबाइल सेवा, सीडीएमए, निश्चित टेलिफोन लाइन सेवा, एडीएसएल सेवा र इन्टरनेट सेवा नै टेलिकमको मुख्य सेवा क्षेत्र भएको हुँदा यी सेवाहरूलाई परम्परागतभन्दा पनि ग्राहकहरूबीच नयाँ–नयाँ स्किम ल्याउन लागिएको पनि आचार्य बताउँछन् । ‘नयाँ तरिकाले नयाँ ग्राहकहरू बनाउने हाम्रो योजना रहेको छ । नयाँ ग्राहकले जुन क्षेत्रमा बढी सेवा चाहेका छन्, त्यही सेवा प्रदान गर्नेछौं । अहिले ग्राहकहरूले इन्टरनेट सुविधा बढी चाहेका छन् । ग्राहकको चाहनालाई ध्यानमा राखेर हामी नयाँ योजना ल्याउनेछौं’– उनी भन्छन् । ग्राहकहरूको माग बढिरहेको हुँदा आगामी वर्षभित्र नै वितरण गर्न लागिएको २२ लाख टेलिफोन लाइन आफूहरूले वितरण गर्न लागिएको पनि उनले बताए ।
टेलिकम क्षेत्रमा अहिले जुन प्रतिस्पर्धा बढिरहेको छ, त्यसलाई आफूहरूले कम नआँकेको आचार्य बताउँछन् । ‘अहिले बजारमा अन्तर्राष्ट्रिय अनुभव बटुलेका सेवा प्रदायकहरू छन्, तिनीहरूसित हामीले प्रतिस्पर्धा गरेर जानु छ । आगामी दिनमा सेवाको विविधिकरण गरेर ग्राहकहरूलाई स्तरीय सेवा दिन लागिपर्नेछौं ।’ अन्य सेवा प्रदायकहरूसित नभएका तर टेलिकमसित भएका सेवाहरूको पनि विस्तार गर्नेतिर टेलिकमले सोचाइ बनाइरहेको छ । उनी भन्छन्– ‘टेलिकम भने राष्ट्रको सेवा प्रदायक कम्पनी हो, यसले सबै ग्राहकहरूले चाहेका सबै प्रकारका सेवा दिन सक्छ र यसको क्षमता छ भन्ने विश्वास दिलाउँदै हामी अघि बढ्नेछौं । यसले हामीलाई प्रतिस्पर्धामा अगाडि लैजान सजिलो बनाउँछ । र, बजारमा अहिले भइरहेको सेवा प्रदायकहरूका तुलनामा गुणस्तरीय सेवा दिने र त्यस्तो सेवा ग्राहकहरूलाई कम शुल्क र विश्वसनीय तरिकाले उपलब्ध गराउन सक्यौं भने अन्य प्रतिस्पर्धीभन्दा अगाडि हुनेछौं ।’