९ मंसिर २०७२, बुधबार ०९:०० बुधवार साप्ताहिक, नयाँबानेश्वर, काठमाण्डौं

बाबुरामलाई किन छाडे यिनले ?

काठमाडौं । संविधान निर्माण प्रक्रियामा भारतलाई उपेक्षा गरिएको भन्दै संसद्बाट राजीनामा दिएर हिँडेका पूर्वप्रधानमन्त्री बाबुराम भट्टराइले अन्तत: दुई वर्ष अघिदेखि भन्दै आएको ‘नयाँ शक्ति’ को घोषणा गरेका छन् । मधेसी नेताहरूको भीड जम्मा गरेर घोषणा गरिएको नयाँ शक्तिका पछाडि वर्षौंदेखि उनलाई साथ दिँदै आएका एमाओवादीका कैयौं नेताले साथ दिएनन् ।
एमाओवादी सचिव टोपबहादुर रायमाझी मात्र होइनन् विगतमा उनलाई जस्तोसुकै अप्ठेरो अवस्थामा पनि साथ दिँदै आएका नेताहरूले उनलाई चटक्कै छाडेका छन् । पश्चिममा बाबुराम गुटलाई बचाउने खगराज भट्ट, मधेसका खम्बा प्रभू साह र पूर्वको कमान्ड सम्हाल्दै आएका हेमराज भण्डारी र श्रीप्रसाद जगेबू पनि भट्टराईको नयाँ शक्तिले केही लछारपाटो नलगाउने निष्कर्षसहित एमाओवादीमै बसे । जबकि पछिल्लो समयमा नयाँ शक्ति गठनका सिलसिलामा भएका हरेक गोप्य भेलामा भण्डारी उपस्थित हुँदै आएका थिए । त्यसबाहेक भट्टराई गुटका भनेर बिल्ला लागेका देवी खड्का, अदालतले जन्म कैदको फैसला सुनाएका बालकृष्ण ढुंगेल, डोरप्रसाद उपाध्याय, देवीराज रेग्मीले पनि भट्टराईको साथ छाडे । जबकि प्रधानमनत्री भएका बेला सार्वजानिक रूपमा बदनाम हुँदाहुँदै पनि भट्टराईले ढुंगेलको मुद्दा फिर्ता लिने निर्णय मन्त्रिपरिषद्बाट गराएका थिए । तर, राष्ट्रपतिले निर्णय अनुमोदन नगरेपछि मुद्दा फिर्ता भएको थिएन । एमाओवादीका एक नेताले भने– ‘ढुंगेलका लागि भट्टराईले त्यत्रो गरे तर उनै ढुंगेलले अहिले भट्टराईलाई पत्याएनन् ।’ राम कार्की र चन्द्रप्रकाश खनालले त भट्टराइलाई एक वर्षअघि नै छाडिसकेका
थिए । भट्टराईनिकट पत्रकार ओम शर्मा र खिलबहादुर भण्डारीले पनि उनको नयाँ शक्तिलाई साथ दिएनन् । एमाओवादी स्रोतका अनुसार संसद्मा भट्टराई गुटका १२–१३ जना सांसद छन्, तर तिनीहरू कोही पनि उनका पछाडि लागेका छैनन् । नयाँ शक्ति घोषणा अभियानको समापन मंगलबार राजधानीको इन्द्ेरणी होटलमा पत्रकार सम्मेलन गरेर गरिएको थियो । पत्रकार सम्मेलनमा रामचन्द्र झा र देवेन्द्र पौडेललाई साथमा लिएर भट्टराईले पत्रकारहरूको जिज्ञासाको जवाफ दिएका थिए ।
भारतको भर
कम्युनिस्ट धरातल छाडेर उपेन्द्र यादव र अशोक राईको संघीय समाजवादी फोरमसँग एकताको हात फैलाएपछि हिजोसम्म पार्टीमा रहँदाका उनका समर्थक झन् बिच्किएको बताइन्छ । एमाओवादीमा रहँदासम्म पार्टीभित्रैबाट ‘भारतीय एजेन्ट’को उपनाम पाएका भट्टराईले अहिले संकटका बेला मधेसवादी दलको आन्दोलनलाई अदृश्य रूपमा सहयोग गरेर छन् । भोलि उनीहरूलाई नै जम्मा गरेर भारतसमेतको समर्थनमा राष्ट्रिय पार्टीको नेता बन्ने डिजाइनअन्तर्गत चलेको बताइन्छ । यही डिजाइनअन्तर्गत अहिले मधेसवादी नेतासँग उनको साँठगाँठ बलियो बन्दै गएको बुझिएको छ ।