१ पुष २०७२, बुधबार ०८:५८ बुधवार साप्ताहिक, नयाँबानेश्वर, काठमाण्डौं

प्रहरी बढुवामा अख्तियारको भिटो

काठमाडांै । नेपाल प्रहरीमा केही अधिकारीको दरबन्दी रिक्त भएपछि बढुवाका लागि चलखेल सुरु भएको  छ । सरुवा–बढुवाका लागि नेताका घर धाउने प्रहरी अधिकारीहरू अहिले पनि अख्तियार प्रमुख लोकमानसिंह कार्कीको घरमा धाउन थालेका छन् ।
कार्की निवास धाउनेमा अख्तियारमा कार्यरत र यसअघि पनि त्यहाँ काम गरेकाहरू छन् । नेपाल प्रहरीमा अहिले ३ एसएसपी, ७ एसपी र २४ जना डीएसपीको पद रिक्त छ । ज्येष्ठता र कार्य सम्पादन मूल्यांकन दुवैलाई आधार मानेर बढुवा गर्ने चलन छ । अख्तियारमा बसेका प्रहरी अधिकारीले अन्य प्रहरीलाई प्रहरी नै होइन जस्तो व्यवहार गर्ने गरेको र बढुका लागि अख्तियार प्रमुख कार्कीलाई भन्ने गरेपछि अन्य प्रहरीहरू छटपटाउन थालेका छन् । एसपीबाट एसएसपीका लागि विकास श्रेष्ठ, ठाकुर ज्ञवाली, तारणी लम्साललगायतको चर्चा छ । यसैगरी, एसपीमा हृदय थापा, सुरेन्द्र मैनालीलगायत दौडमा छन् । डीएसपीका लागि भने रमेश थापा, राजकुमार बैदवार, डा. तपन दाहाल, कमुद ढुंगेललगायत छन् ।
प्रहरी प्रवक्ता डीआईजी कमलसिंह बमले छिटो दरबन्दी पूर्ति गरिने जानकारी दिए । उनले मर्यादाक्रममा रहेका नामबारे भने आफूलाई थाहा नभएकाले कर्मचारी प्रशासन शाखामा बुझ्न आग्रह गरे ।