१० कार्तिक २०७३, बुधबार ०६:३२ बुधवार साप्ताहिक, नयाँबानेश्वर, काठमाण्डौं

वायुसेवामा २७ लाख ठगी

काठमाडौं । नेपाल वायुसेवा निगममा ‘गुमेको पैसा फिर्ता नआउने गरी’ चेज एयर काण्डजस्तै अर्को काण्ड घटेको छ । निगमका कर्मचारीको मिलेमतो र दूरदर्शीताको अभावका कारण त्यसरी जानाजान निगमलाई २७ लाख रुपैंया घाटा लागेको पत्ता लागेको छ ।

जहाजको सिट तथा क्याबिनसम्बन्धी तालिमका लागि निगमको इन्जिनियरिङ विभागले तीन महिनाअघि नै २५ हजार अमेरिकी डलर मुम्बईमा पठाएको थियो । तर पछि बुझ्दै जाँदा उक्त कम्पनी तालिम गराउन सक्ने खालको कम्पनी नै नभएको पुष्टी भएको छ ।

तसर्थ, तीन महिनाको बीचमा न निगमका कर्मचारीले तालिम हासिल गरे न त उक्त रकम नै फिर्ता पाएका छन् । तालिम गराउन नसकेपछि निगमले रकम फिर्ताको लागि प्रयास गर्दा सो कम्पनीले उक्त रकम दिनसमेत आनाकानी गर्दै आइरहेको बताइन्छ ।

उक्त रकम मुम्बई पठाउने कामको अगुवाइ सोही विभागका उपनिर्देशक महेश मरिताले गरेका थिए । पहिल्यै पुरै रकम पठाउन आवश्यक नहुँदानहुँदै पनि मोटो रकम कमिसन पाउने लोभमा इन्जिनियरिङ विभागले उक्त निर्णय गरेको निगमका कर्मचारीहरू बताउँछन् । सुरुमा थोरै रकम पेस्कीस्वरूप पठाउँदा पनि हुने स्थानमा आफूहरूले कमिसन बाँडे मालामाल हुने भएकाले उक्त रकम एकैचोटी निकासा गरिएको निगमका कर्मचारीहरू बताए ।

निगमले उक्त रकम फिर्ता ल्याउन नसकेमा उपनिर्देशक मरिताको तलबबाटै कट्टा गरेर शोधभर्ना गर्नुपर्ने कर्मचारीहरूको माग छ । निगमका महाप्रबन्धकले एकपटकमा ३० करोडसम्म खर्च गर्ने अधिकार छ, तर निगमका हरेक विभागले आवश्यकता नै नपरेको स्थानमा पनि करोडौंको खरिद बिक्री गरी निगमलाई टाट पल्टाउने काम गर्दै आएका छन् ।