९ चैत्र २०७३, बुधबार ०५:४३ बुधवार साप्ताहिक, नयाँबानेश्वर, काठमाण्डौं

भेटीले धान्नै नसक्ने गरी नियुक्ति

काठमाडौं । दान दक्षिणा र भेटीबाट उठेको रकमले तलब खानुपर्ने लुम्बिनी विकास कोषमा अहिले धमाधम ज्यालादारीमा कर्मचारीहरू भर्ना गरिएको छ । सदस्य–सचिव अजितमान तामाङले लुम्बिनी छाडेर हिँडेपछि र उपाध्यक्ष भिक्षु निग्रोधले पनि लुम्बिनीप्रति खासै चासो नदिएपछि कोषका अरू कर्मचारीहरूले ज्यालादारीमा कर्मचारीहरू भर्ना गर्न थालेका हुन् ।

कोषका प्रशासकीय अधिकृत चूडामणि भट्टराई, वरिष्ठ वनस्पति अधिकृत छविरमण खाँ र नायब सुब्बा नवराज अधिकारीले ज्यालादारीमा कर्मचारी राखेर आर्थिक स्रोत सुक्दै गइरहेको कोषलाई समस्यामा पार्न लागेको बताइन्छ । यी कर्मचारीहरूले कर्मचारीहरूको आन्दोलन स्थगन भएपछि करिब ४० जनालाई ज्यालादारीमा भर्ना गरेका छन् । ज्यालादारी कर्मचारीहरू थप्न थालिएपछि तिनीहरूलाई कसरी धान्ने भन्ने समस्या उत्पन्न भइसकेको बताइन्छ । किनकि, कोषका कर्मचारीहरूका तलब भेटी र दानदक्षिणास्वरूप उठेका रकमबाट पूर्ति हुँदै आइरहेको छ । अहिले ज्यालादारीमा रहेका कर्मचारीहरू कुनै ट्याक्सी चलाउने छन् भने कुनै वैदेशिक रोजगारीमा गएर फर्किनेहरू रहेका छन् ।

यसैगरी, विगत चार महिनादेखि कोषका सदस्य–सचिव तामाङले लुम्बिनीमा पाइला नटेके पनि नवनियुक्त संस्कृति, पर्यटन तथा नागरिक उड्डयनमन्त्री दिलनाथ गिरीलाई मन्त्रालयमा पुगेर खादा ओढाउन भने भ्याएका छन् । कोषका पदाधिकारीहरूले मन्त्री भएलगत्तै गिरीलाई बधाई दिन मन्त्रालय गएका थिए । तर, मन्त्री गिरीले भने खादा ओढाउन मात्र समय दिएका थिए । मन्त्रीले ‘तपार्इंहरूले राम्रैसँग काम गर्नुभएको होला, म निरीक्षण गर्न आउनेछु’ भनी जवाफ दिएका थिए ।

त्यसो त आर्थिक वर्ष सकिन केही महिना मात्र बाँकी रहे पनि लुम्बिनीका निम्ति छुट्ट्याइएको बजेटको ५० प्रतिशत काम पनि हुन सकेको छैन । अहिले सरकारले दिएको ५५ करोड र आन्तरिक स्रोतबाट गरी करिब ६० करोडजति बजेट भए पनि अहिलेसम्म ३० करोड पनि खर्च हुन सकेको छैन । विकास, निर्माण शीर्षकका रकमहरू खर्च हुन नसकेको बताइन्छ ।