२३ फाल्गुन २०७०, शुक्रबार ०९:३६ बुधवार साप्ताहिक, नयाँबानेश्वर, काठमाण्डौं

नयाँ सरकारसँग प्रवासीका अपेक्षा

सम्पादकज्यू,
संविधानसभा निर्वाचनपछि लामो समयको अन्योलतालाई चिर्दै स्वच्छ छविका रूपमा चिनिएका नेपाली कांग्रेसका सभापति सुशील कोइरालाले व्यवस्थापिका–संसद्मा प्रधानमन्त्रीको एकल उम्मेदवारका रूपमा विजय हासिल गर्नुभएको थियो । नवनिर्वाचित प्रधानमन्त्री कोइरालाले मन्त्रिपरिषद्को विस्तार गरेर आफ्नो मन्त्रिपरिषद्लाई समेत पूर्णता दिनुभएको छ । सम्पूर्ण गैरआवासीय नेपालीहरूको तर्फबाट प्रधानमन्त्री कोइराला, उपप्रधान तथा गृहमन्त्री वामदेव गौतम, उपप्रधान तथा स्थानीय विकासमन्त्री प्रकाशमान सिंहलगायत वर्तमान मन्त्रिपरिषद्मा चयन हुनुभएका सबै मन्त्रीहरु र राज्यमन्त्रीलाई हादिर्क बधाई दिन चाहन्छांै । साथै उहाँहरूको कार्यकालको पूर्ण सफलताको कामना पनि गर्दछांै । संविधानसभामा निर्वाचित विभिन्न राजनीतिक दलहरूका बीच सहमति जुटाउन र मुलुकमा सुशासन कायम गरी विकास निर्माणका कामहरू अघि बढाउनमा अहिले बनेको संयुक्त सरकारलाई पूर्ण सफलता मिलोस् भन्ने चाहन्छांै ।
अहिले जनताको मुख्य चाहना शान्ति सुरक्षाको प्रत्याभूति, अमनचयन र स्वच्छ, प्रभावकारी तथा भ्रष्टाचाररहित प्रशासनिक निकायहरू नै हुन् । जनताको अपेक्षालाई सरकारले तत्काल सम्बोधन गर्नुपर्छ । त्यस्तै, गैरआवासीय नेपाली संघ, अन्तर्राष्ट्रिय समन्वय समिति र गैरआवासीय नेपालीहरूले नेपालमा अब बन्ने संविधानको माध्यमबाट नेपाली नागरिकताको निरन्तरता हुनुपर्ने प्रश्नलाई अहिले जोडदार ढंगले उठाइरहेका छन् । यस विषयमा सबै पक्ष सकारात्मक देखिएको अवस्था पनि छ ।
प्रधानमन्त्री कोइरालाको नेतृत्वको सरकारले देशबाहिर र भित्र छरिएर रहेका सबै नेपाली जनताका चाहना पूरा गर्नमा पूर्ण सफलता प्राप्त गरोस् र मुलुकमा आर्थिक र बौद्धिक लगानी भित्र्याई मुलुकको आर्थिक, सामाजिक समृद्धिका लागि सरकारसँग हातेमालो गर्दै अघि बढ्नका लागि गैरआवासीय नेपाली संघ सदैव तत्पर रहेको छ ।