१८ असार २०७१, बुधबार ०७:४८ बुधवार साप्ताहिक, नयाँबानेश्वर, काठमाण्डौं

पाहुनाहरू आउँदै

काठमाडौं । नेकपा (एमाले)को नवौं महाधिवेशनका लागि विभिन्न मुलुकका नेताहरू आउने भएका छन् । मंगलबार मध्यान्हसम्म सात मुलुकका नेताहरूले आफ्नो सहभागिता हुने जनाइसकेका छन् भने अरू नेताहरूको पनि आउने सम्भावना रहेको एमाले विदेश विभागले जनाएको छ ।
भारतीय कम्युनिस्ट पार्टी (सीपीआई)का डी राजा महाधिवेशनमा सहभागी हुँदैछन् भने भियतनामका ली गाइकिन र तान्डाक लईले महाधिवेशनमा सहभागिताका लागि ‘कन्फरमेसन’ पठाएका छन् ।
यस्तै, रसियाबाट सावेज दोरोखिन र उनकी पत्नी महाधिवेशनमा आउने भएका छन् । बंगलादेशबाट सैफुल हक, फजल हुसेन बादशाह, अलि अहमद इनामुल भाग लिन आउँदैछन् ।
यस्तै, कम्बोडियाबाट योस सन, फङ्चान भिष्णा आउने भएका छन् भने श्रीलंकाबाट सोमवान अमरासिंगे, विलफ्रेड जयनिंगे आउने भएका छन् । यस्तै, टर्कीबाट सोनर स्माइल युनुस, अकिल विज मेहेमेद, अखिराज मेहेमेद कान आउने पक्कापक्की भएको एमाले विदेश विभाग सदस्य यादव शर्माले बताए ।
शर्माका अनुसार, सीपीआईएम, फरवार्ड ब्लक, सीपीआईएमएलका प्रतिनिधि आउने जनाए पनि उनीहरूको ‘कन्फरमेसन’ आइसहेको छैन । यस्तै, छिमेकी मुलुक चीनबाट पनि प्रतिनिधिको नाम आइसकेको छैन । भारतीय कम्युनिस्ट पार्टीका सीताराम येचुरी आफैं आउने सम्भावना पनि छ ।