१५ श्रावण २०७१, बिहीबार ०८:०७ बुधवार साप्ताहिक, नयाँबानेश्वर, काठमाण्डौं

वामदेव गौतमलाई पत्र

वामदेव गौतमज्यू,
तपाईं यतिबेला उपप्रधान तथा गृहमन्त्रीका साथै नेपाली जनताको त्याग र बलिदानबाट स्थापित जनताको गौरवशाली पार्टी नेकपा (एमाले) को उपाध्यक्ष हुनुहुन्छ । तपाईंका पछिल्ला क्रियाकलापले गर्दा आज मातृभूमिप्रति माया गर्ने जो–कोही नेपाली अनि दोस्रो संविधानसभाको निर्वाचनमा दुई ठाउँबाट अमूल्य मत दिएर जिताउने महान् नेपाली जनता एवम् एमालेको सिद्धान्तलाई आत्मसात् गर्ने जो–कोही नेपालीले पनि दिक्क मानिरहेका छन् । नेकपा (एमाले)का पदाधिकारी र वरिष्ठ नेताहरूमध्ये सबैभन्दा पहिला पार्टी सदस्यता लिने नेता भए पनि नेपाली जनताको पक्षमा तपार्इंले माखो मार्न सक्नुभएको छैन । मदन–आश्रितको हत्या गिरिजाले गरेका हुन् भनेर सडक तताउने तपार्इंंले पटक–पटक गृह मन्त्रालय सम्हाल्न पुग्दा पनि हत्याराको बारेमा गुत्थी पहिल्याउन सक्नुभएको छैन । हालसम्म गरी तीनचोटी गृह मन्त्रालयको बागडोर सम्हालिसक्नुभएको तपार्इं खाली कर्मचारी तथा प्रहरी सरुवा–बढुवामा केन्द्रित हुनुको अर्थ के ? तपाईंको खाली प्रहार शान्ति सुरक्षाको क्षेत्रमा अहोरात्र खटिने ती बहादुर नेपाली आमाका सन्ततिमाथि किन हुन्छ ? २०५३ सालमा पहिलो पटक गृहमन्त्री  हुँदा प्रहरी महानिरीक्षक पदमा बढुवा भएको ३६ दिनमै अच्युतकृष्ण खरेल हटाएर धु्रवबहादुर प्रधानलाई महानिरीक्षक बनाउनुभएको थियो । अहिले आफ्नो कर्तव्यनिष्ठतामा अडिग रहेर अपराधीप्रति कठोर छवि बनाएका प्रहरीलाई प्रोत्साहित गर्नुको साटो हतोत्साहित किन गरिरहुनभएको छ ? के प्रहरी संगठन तपाईंको निजी सम्पत्ति हो र ? डीआईजीद्वय प्रतापसिंह थापा र वीरेन्द्रबाबु श्रेष्ठले तीन करोडको ब्रिफकेस बुझाएका कारण बढुवा सूचीमा पारियो भन्ने खबर सार्वजनिक हुँदा पनि तपाईं मौन रहनुभयो । देशको शान्ति सुरक्षा र अस्तित्व समेत रहेको विषयलाई पैसासँग तुलना गर्ने किन ? हत्या आरोपमा सर्वस्वसहित जन्मकैद सुनाइएका ओखलढुंगाका एमाओवादी पूर्वसभासद् बालकृष्ण ढुंगेललाई अहिलेसम्म फेला नपरेको बताउने तपार्इं करोडौंको ब्रिफकेस कहाँबाट र कसरी फेला पार्नुहुन्छ ? पञ्चायतकालमा कार्यकर्ताले दिएका ती लोकप्रिय नाम भैरव, चौधरी अनि हलीदाइको पगरी आज वामदेव गौतमज्यूलाई भारी भएको छैन ?
सत्ता र शक्तिको भरपूर उपयोग गर्न नपाएको झोक अनि ०५४ सालमा खड्गप्रसाद ओलीसँगको द्वन्द्वमा नेकपा
(एमाले)लाई विभाजन गरी नेकपा (माले) बनाउँदै महासचिव भएर पुन: एमालेमा फर्किए पनि एमाले पार्टीको साखलाई तपार्इंको क्रियाकलापले धमिल्याइरहेको छ । कानुनको संरक्षक बनेर गृह मन्त्रालय सम्हाल्न पुग्नुभएका तपाईं नेपाली पोसाकमा ठाँटिएर ‘रोड डिभाइडर’ नाघी नियम कानुनलाई कालो बुटले कुल्चने अनि नेपाली जनतासँग माफी माग्नुको सट्टा नेपाली जनताको वाक स्वतन्त्रतामाथि लाठी बर्साउने काम गर्नुहुन्छ । सामान्य प्रशासनमन्त्री लालबाबु पण्डितको आज जताततै चर्चा भइरहँदा तपार्इंका क्रियाकलापप्रति नेपाली जनता किन आलोचक छन् ? हुन त संसद्मा एमालेकै सभासद्ले शान्ति सुरक्षा कायम राख्न असफल भएको भनेर टिप्पणी गरिसकेका छन् । भारतीय सीमा सुरक्षाबल (एसएसबी)ले सुस्ताका नेपाली जनतालाई कति यातना दिइरहेका छन् यसका बारेमा तपाईं जानकार भए पनि केही गर्न सक्नुहुन्न किन ? तपार्इं आफूलाई सेलिब्रेटी ठान्नुहुन्छ तर भिलेन बनिरहनुभएको छ, तपाईलाई थाहा छैन जसको पछिल्लो उदाहरण उपप्रधान तथा गृहमन्त्रीजस्तो ओहोदामा रहेको व्यक्तिलाई भारतीय विदेशमन्त्री सुष्मा स्वराजको कार्यव्यस्तताको कारण जनाउँदै लामो पर्खाइपछि भारतीय पक्षले अहिले भेट्न नमिल्ने जनाउ दिएर फर्काउँदा पनि आफूमा हिनताबोध गर्नुभएन ।
नेपाली जनतालाई थाहा छ ०५७ सालमा एक नम्बर भ्रष्टाचारी भन्दै टुँडिखेलबाट घोषणा गर्ने र पार्टी सदस्य मध्येबाटै अदालतमा समेत मुद्दा हाल्ने प्रक्रिया समेत चलेको थियो । कुनै बेला माओवादीलाई दमन गर्न आतंककारी ऐन ल्याउने तपाईं त्यसको दोष पखाल्न माओवादी पार्टीमा जान प्रचण्डसँग लबिङ नगर्नुभएको होइन । तर, एमाओवादीले पत्याएन् । हुन त सुरासुन्दरी काण्डदेखि टिवडेवाला काण्ड अनि विराटनगरका गिरीथरका कांग्रेसीलाई दुई करोड दिएको घटनासम्ममा तपाईंकै चर्चा यत्तिकै भएको होइन होला ।
तसर्थ, तपार्इंका क्रियाकलापले एमालेको साख गिराउने पक्का छ । जनताको त्याग र बलिदानबाट बनेको यो गौरवशाली पार्टीको गरिमालाई बचाउनका लागि पनि तपार्इंले गृह मन्त्रालय त्यागेर गोकर्ण विष्ट, रबीन्द्र अधिकारी जस्ता युवा पुस्तालाई ठाउँ दिन जरुरी छ । जसले गर्दा नेकपा (एमाले)को लोकप्रियता अझ बढ्छ । देश, जनता र पार्टीभन्दा ठूलो तपाईं जतिसुकै ओहोदामा रहे पनि हुन सक्नुहुन्न  । लोकतन्त्रमा जनता मालिक हुन्छन् तपार्इंमा पनि यति चेतना त
छ होला ।
– अर्जुन बराल
हाल दक्षिण कोरिया