२८ श्रावण २०७१, बुधबार ०८:५७ बुधवार साप्ताहिक, नयाँबानेश्वर, काठमाण्डौं

मोदीको भाषणबाट प्रवासी गदगद्

भारतमा बसोबास गर्दै आएका लोकतन्त्र, शान्ति, मैत्री, समृद्धिका पक्षपाती हामी प्रवासी नेपालीहरू भारतीय प्रधानमन्त्री नरेन्द्र मोदीको नेपाल भ्रमणप्रति अत्यन्तै सन्तुष्टि व्यक्त गर्दछौं । नेपालप्रति विकसित उहाँको राजनीतिक बुझाइ र परस्पर सम्मान एवम् समृद्धिको पक्षमा अभिव्यक्त अवधारणाहरूप्रति सम्मान गर्न चाहन्छौँ । नेपालको ऐतिहासिक संविधानसभा एवम् व्यवस्थापिका संसद्मा गर्नुभएको सम्बोधनका सारभूत पक्षलाई लिएर गौरवान्वित महसुस भएको कुरा यहाँ व्यक्त गर्न चाहन्छाँै ।
भारतस्थित प्रवासी नेपालीहरूले झेल्नुपरेका कतिपय समस्याहरूलाई लिएर हामी चिन्तित थियाँै । समयको एउटा महत्त्वपूर्ण एवम् लामो कालखण्डदेखि नै समस्याहरूलाई सूत्रबद्ध रूपमा उठान गर्ने, यससँग अन्तरसम्बन्धित पक्षलाई चिन्दै र चिर्दै समाधानका लागि निकै ठूलो पहलकदमी लिँदै अघि बढ्ने काममा संलग्न रहँदै आएका थियाँै । विभिन्न प्रकारका रचनात्मक क्रियाकपालमार्फत विभिन्न बेलामा द्विदेशीय सरकार र सम्बद्ध पक्षहरूको ध्यानाकर्षण गर्दै गराउँदै आएका थियाँै ।
यही रचनात्मक कामको निरन्तरता, हाम्रा माग एवम् दबाबमूलक कामको फलस्वरूप भारतीय प्रम मोदीले ‘आजको विकासोन्मुख भारतको निर्माण एवम् विकासमा नेपालीहरूको भूमिका नमनयोग्य छ । यस्तो पृष्ठभूमिबाट विकसित नेपाल–भारत सम्बन्धलाई अलग्याएर हेर्न सकिँदैन र हुँदैन ।
नेपाल–भारत सीमा एवम् सीमावर्ती क्षेत्रको सुरक्षा, दूरदर्शन सहकार्य र भारतबाट नेपाल ट्रंकल गर्दा लाग्ने चर्को टेलिफोन दर एवम् महसुललाई कम गर्नुपर्नेछ’ भन्ने उहाँको सम्बोधनको सारभूत कुरा नेपालको संविधानसभा–व्यवस्थापिका संसदमै उठाएका छन् । यो आवाज सुनिरहँदा यस श्रव्यदृश्यले हामीलाई हौसलाबुलन्द्ध गरेको छ । ढिलो–चाँडो हाम्रा कुराहरू सुनिएको र हामीले उठाएका माग एवम् मुद्दाहरू सम्बद्ध क्षेत्रमा दर्ता भएको महसुस भएको छ । हाम्रा आवाजहरूमा राज्य एवम् राज्य सरकारको ध्यानाकर्षण हुँदो रहेछ भन्ने कुराको निर्वाध अनुभूति भएको छ ।
यस परिपेक्ष्यमा प्रम मोदीको यो सारगर्भीत सम्बोधन अक्षरश: व्यवहारमा कार्यान्वयन हुन सकोस्, नेपाल–भारतबीच स्थापित शदियौं पुरानो जनमैत्रीय सम्बन्धले अब एउटा नयाँ उचाइ ग्रहण गर्न सकोस् र एउटा नवीन आयामले गति लिन सकोस् ।
– युवराज बास्कोटा ‘यज्ञ’
महासचिव, प्रवासी नेपाली संघ भारत