२५ भाद्र २०७१, बुधबार ०७:२७ बुधवार साप्ताहिक, नयाँबानेश्वर, काठमाण्डौं

साइँलाको गजपको निर्णय

सोलुखुम्बुका साइँला अर्थात् एनेकपा (माओवादी) का नेता गोपाल किराँती बेलाबखत ‘चक्मा’ दिने गरी काम गर्छन् । कुनै बेला, आफू भरिया रहेको सहर्ष बताउने साइँला पार्टीको लाइन मिलोस् वा नमिलोस्, ड्यांगै निर्णय गर्न चुक्दैनन् । उनको जातीय मोर्चाले केही दिनअघि एउटा निर्णय गर्‍यो–पृथ्वीनारायण शाहले नेपालको एकीकरण गरेर बेसै गरे ।
तर, उनको मोर्चाले पृथ्वीनारायण शाहको एकीकरण अभियानलाई सही ठहर्‍याए पनि माउ पार्टीले भने अहिलेसम्म पनि शाहलाई विस्तारवादी नै ठान्दै आइरहेको छ । र, पृथ्वीनारायण शाहले गरेको नेपालको एकीकरणलाई एमाओवादीले अहिलेसम्म नचाहिँदो कामको रूपमा परिभाषित गर्दै आइरहेको छ । माउ पार्टीले पृथ्वीनारायणको कदमलाई दुत्कार्दै आए पनि उनको मोर्चाले भने विज्ञप्ति नै निकालेर राम्रो मानेका छन् । उनले किन यसो गरे, उनी नै जानुन् ।
हुन पनि, साइँला अजीवकै पात्र हुन् । गएको संविधानसभाको निर्वाचनमा उनले पहिला जितेको सोलुखुम्बु छाडेर झापाको ७ नम्बर क्षेत्र रोजे, जहाँबाट एमाले नेता केपी शर्मा ओली उनका प्रत्यासी थिए । तर, उनले नराम्रो पराजय बेहोर्नुपर्‍यो । तर, एमाले महाधिवेशनमा अध्यक्षमा उठेका ओलीलाई भने फरक पार्टीकै भए पनि उनले खुलेरै समर्थन गरे र भने–एमाले अध्यक्ष ओली बन्नुपर्छ । उनले किन त्यसो भने, उनी नै जानुन् ।
साइँलाले बेलाबखत अनौठो काम गर्नुलाई आश्चर्य मान्नु पर्दैन । त्यस्ता कामहरू उनी गरी नै रहन्छन् । कुनै बेला, उनले आफू निर्वाचित भएको जिल्ला सोलु पुगेका तत्कालीन भारतीय राजदूत राकेश सूदलाई कालो झन्डा नै देखाइदिए । सूदलाई हायलकायल नै पारे । यस्ता काम गर्न उनी माहिर नै मानिन्छन् । र, यस्तै कामबाट नै उनी राजनीतिमा स्थापित पनि छन् । उनको भलो होस् ।