२ आश्विन २०७१, बिहीबार ०९:२१ बुधवार साप्ताहिक, नयाँबानेश्वर, काठमाण्डौं

बाहिरबाट संविधान जारी नगर्न चेतावनी

काठमाडौं । नेकपा (एमाले) निकट नेपाल बुद्धिजीवी परिषद्ले संविधानसभा बाहिरबाट नयाँ संविधान जारी नगर्न दलहरूलाई आग्रह गरेको छ । परिषद्को पाँचौं पूर्ण बैठकपछि नवलपरासीको गैंडाकोटमा आयोजित पत्रकार सम्मेलनमा अध्यक्ष डा. दिनेशचन्द्र देवकोटाले लहडका भरमा स्थापित विधिलाई लत्याएर संविधानसभा बाहिरबाट संविधान जारी गर्न खोजिए मुलुकले ठूलो मूल्य चुकाउनुपर्ने बताउनुभयो ।
विगतमा नेताहरूले आफुखुसी संविधानसभा बाहिर संविधानसभाका अन्तरवस्तु सहमति जुटाउन गरेको प्रयास असफल भएको उदारहण दिँदै डा. देवकोटाले यस पटक त्यस्तो कार्य नदोहोर्‍याउन आग्रह गर्नुभयो । उहाँले सहमति नभएका विषय कार्यतालिका अनुसार संविधानसभा भित्रैबाट टुङ््ग्याएर माघ ८ भित्र नयाँ संविधान जारी गराउन परिषद्ले देशभरका बुद्धिजीवीहरूमार्फत दबाब सिर्जना गर्नेसमेत जानकारी दिनुभयो ।
भदौ २७ र २८ गते गरी दुई दिनसम्म चलेको परिषद्को केन्द्रीय कार्यसमितिको बैठकले समयमै चनाखो नभए मुलुक ठूलो दुर्घटनामा पर्न सक्ने भन्दै संविधान निर्माणका लागि बौद्धिक बहस र अभियान सञ्चालन गर्ने निर्णय गरेको छ । बैठकले संविधानका विवादित विषयमा सुझावसमेत संकलन गरी प्रधानमन्त्री, सभाध्यक्ष र सबै दलका शीर्ष नेताहरूलाई ध्यानाकर्षणपत्र बुझाउने, राज्यको पुन:संरचना, शासकीय स्वरूप जस्ता एजेन्डामा देशैभर बहस चलाएर आएका निष्कर्षहरू दलहरूलाई बुझाउनेलगायतका निर्णयहरू गरेको छ । बैठकले पार्टीको नवौं महाधिवेशनको मर्म र कार्यकर्ताको भावना अनुसार एकताबद्ध हुन शीर्ष नेताहरूको ध्यानाकर्षणसमेत
गराएको छ ।