३० पुष २०७१, बुधबार १०:३१ बुधवार साप्ताहिक, नयाँबानेश्वर, काठमाण्डौं

ऐना हेर्न सुझाव

आफूलाई मधेसी जनताको मसिहा ठान्ने धेरै मधेसी नेताहरू छन् । तर, खाँटी मसिहा ठान्नेमा चाहिँ सर्लाहीतिरका राजेन्द्र महतो पर्दछन् कि क्या हो ? होइन भने, उनले अहिले आफूलाई सिंगो मधेसकै प्रवक्ताका रूपमा जसरी उभ्याइरहेका छन्, त्यसले उनी मधेसी जनताको नम्बर वान मसिहा हुन् भन्ने सर्वत्र भान भइरहेको छ ।
महतो मधेसी जनताका मसिहा हुन् वा होइनन् ? राम जाने । तर, महतो सत्ताको सेरोफेरोमा रम्ने एक भाग्यमानी मधेसी भने अवश्य नै हुन् । दोस्रो संविधानसभाको निर्वाचनमा चुनाव हारेर मात्र हो, होइन भने उनी अहिले कुनै मन्त्रालयको सानदार कुर्सीमा बसिरहेका हुन्थे र रातो झन्डा फहराउँदै पुल्चोकदेखि सिंहदरबारसम्मको यात्रा जारी राखिरहेका हुन्थे । तर, के गर्नु † आफूलाई मधेसीको मसिहा ठाने पनि उनलाई मधेसी जनताले पत्याएनन् । नमज्जाले चुनाव हार्नुपर्‍यो ।
हुन पनि, दुई चार वर्षअघिसम्म महतोको सान नै बेग्लै थियो । उनलाई मधेसका जनताले हरेक पटक पत्याउँदै आएका थिए । पञ्चायतकालमा पनि उनले जिल्ला हाँकेकै हुन् । बहुदल आएपछि पनि उनले पटक–पटक सर्लाहीका जनताको विश्वास जितेकै हुन् र उनलाई सिंहदरबारमा पठाउन मधेसका जनताले सदाशयता देखाएकै हुन् । अहा † ती दिनहरू कति रमाइला थिए ।
०६४ को संविधानसभाको निर्वाचनपछि त उनले सत्ताको भरमग्दुर स्वाद लिए । मधेस आन्दोलन चम्किएको बेला त्यसलाई भजाएर चुनाव जितेका उनले पटक–पटक मन्त्री बन्ने सुऔसर पाए । पछिल्लो समयमा स्वास्थ्यमन्त्री बनेका उनले राम्रै आर्थिक फाइदा पनि उठाएको चर्चा/परिचर्चाले तत्कालीन समय निकै गर्माएको थियो । स्वास्थ्य मन्त्री हुँदा कुम्ल्याएको रकमको आडभरोसामा आफूले नेतृत्व गरेको पार्टीलाई देशव्यापी बनाउने अभियान पनि उनले नचालेका होइनन् । तर, जति गरे पनि उनको पार्टी दोस्रो संविधानसभा निर्वाचनमा एक सिटमै खुम्चिनुपर्‍यो ।
मधेसी जनताद्वारा अस्वीकृत यिनै महतो अहिले भने चर्का कुरा गर्नेमा दरिएका छन् । तराईका सबै समथर भू–भागलाई एउटै तराई प्रदेशमा गाभ्नुपर्ने कुरा उठाएर उनले आफूलाई तराईको खाँटी नेता बनाउन खोजे पनि तराईमा उनको हालत पत्ला भएको पक्षलाई उनले कतिसम्म बुझेका छन् ? महतोले आफ्नो अनुहार एक पटक ऐनामा हेरे हुन्थ्यो कि ?