७ माघ २०७१, बुधबार ११:३८ बुधवार साप्ताहिक, नयाँबानेश्वर, काठमाण्डौं

नेपालद्वारा चिसोपीडितलाई कम्मल वितरण

रौतहट । नेकपा (एमाले)का वरिष्ठ नेता तथा पूर्वप्रधानमन्त्री माधवकुमार नेपालले रौतहटका चिसोपीडितलाई कम्मल वितरण गर्नुभएको छ । उहाँले आइतबार रौतहटको सखुहवा धमैरा तथा राजपुर तुल्सी क्षेत्रका चिसोपीडितलाई उनीहरूको बस्तीमै पुगेर कम्मल वितरण गर्नुभएको हो ।
नेपाल निजामती कर्मचारी संगठन, अर्थ मन्त्रालय विभागीय समितिको संयोजनमा अलग–अलग कार्यक्रमका बीच करिब ४ सय कम्मल वितरण गरिएको हो । कार्यक्रममा नेता नेपालले माघ ८ मा संविधान आउन मधेसकेन्द्रित दल र एनेकपा माओवादी बाधक रहेको आरोप लगाउनुभयो ।
एकीकृत नेकपा माओवादी र मधेसकेन्द्रित दलले हामीले जे भन्छौं त्यही हुनुपर्ने अडान राखेका कारण संविधान निर्माणमा समस्या भएको समेत नेता नेपालले बताउनुभयो । उहाँले अब सहमतिका लागि कुर्ने समय नभएको बताउँदै प्रक्रियामा आउन विपक्षमा रहेका सबै दलहरूलाई आग्रह गर्नुभयो । कार्यक्रममा संगठनका केन्द्रीय अध्यक्ष पुण्य ढकाललगायत एमाले रौतहटका स्थानीय नेताहरूको सहभागिता थियो ।