२१ माघ २०७१, बुधबार ११:१३ बुधवार साप्ताहिक, नयाँबानेश्वर, काठमाण्डौं

ग्यास बितरणमा संसदीय समिति असन्तुष्ट

काठमाडौंं । वाणिज्य तथा आपूर्तिमन्त्री सुनीलबहादुर थापालाई मोटो रकम बुझाएर केही दिनअघि मात्रै नेपाल आयल निगमको कार्यकारी निर्देशक बनेका गोपालबहादुर खड्कालाई अहिले आफ्नो जिम्मेवारी हाडेओखर फुटाउनुजस्तै हुनपुगेको छ । व्यापारीहरूले ग्यासको कृत्रिम अभाव सिर्जना गरेर बजारमा ग्यासको हाहाकार मच्चिरहेका बेला कार्यकारी निर्देशक बनेका खड्कालाई तत्कालीन समस्या पार लगाउन हम्मेहम्मे परेको बताइन्छ ।
हिजो मात्रै संसद्को आपूर्ति तथा उपभोक्ता हित सम्बन्ध उपसमितिले कार्यकारी निर्देशक खड्कालाई बोलाएर ग्यास आपूर्ति सहज बनाउन कडा निर्देशन दिएको छ । उपसमितिका संयोजक सभासद् सुवासचन्द्र ठकुरीले भने, अहिले पनि एलपी ग्यास सहज रूपमा उपलब्ध भइरहेको छैन । हामीले निगमका जिम्मेवार व्यक्तिलाई बोलाएर ग्यास आपूर्ति र वितरणको अवस्थाबारे जानकारी लियौं । र, उपभोक्ताहरूले सहज रूपमा ग्यास पाउने व्यवस्था मिलाउन निर्देशन दियौं ।
बजारमा ग्यासको कृत्रिम अभाव सिर्जना गरिएपछि अहिले निगमले क्षेत्रगत रूपमा ग्यास बिक्री–वितरण गर्दै आइरहेको छ । तर, संसदीय उपसमितिले भने त्यसरी गरिएको बिक्री–वितरणमा चित्त बुझाइरहेको छैन । उपसमितिले कार्यकारी निर्देशक खड्कालाई क्ष्ोत्रगत रूपमा भइरहेको वितरणमा कुन दिन, कुन क्षेत्रमा, कुन कम्पनीको कति वटा ग्यास सिलिन्डर वितरण हुने हो, त्यसबारे उपभोक्तालाई पूर्वजानकारी गराइनुपर्ने निर्देशन पनि दिएको छ । त्यस्तै, उपसमितिले निगमलाई अहिले वितरण गरिरहेको २२ हजार ३ सय ७७ हजार मेट्रिक टनमा ४ हजार मेट्रिक टन बढाएर वितरण गर्न पनि निर्देशन दिएको छ । साथै, अहिले कति हजार ग्यास सिलिन्डर वितरण भइरहेको हो, सोबारे यथार्थ विवरण दिन पनि निगमलाई निर्देशन दिइएको छ ।